Тадқиқотчилар ярим кун ичида коронавирусни аниқлай оладиган ниқоб устида ишламоқда.
Дунё бўйича қарийб 88 мингдан ошиқ одам Сovid-19 коронавируси билан касалланди. Хавф ва у билан бирга келадиган ташвиш бутун дунё бўйлаб ёйилишда давом этар экан, олимлар бир неча соат ичида коронавирусни аниқлай оладиган икки минг фунт стерлингли қурилмани синаб кўришмоқда.
Лестер университети тадқиқотчилари ярим кун ичида коронавирусни аниқлай оладиган ниқоб устида ишламоқда.
Синовлари бошланган ушбу қурилма сил касаллигини аниқлай олиши аллақачон исботланган.
Ажалвор вируснинг ташхисини қулайлаштирувчи мазкур ниқоб тақилган пайтда нафас томчиларини ютади. Бактериал ёки вирусли инфекция бор-йўқлигини аниқлаш учун лабораторияда текширилади ва натижани олиш бир неча соат вақтни талаб этади. Ҳозирги коронавирус синовлари 48 соат давом этиши мумкин.
Тадқиқот олиб борган олимларнинг таъкидлашича, ҳақиқий Сovid-19 беморларида ниқобни синаш учун камида икки ой керак бўлади. Аммо коронавирус нафас олиш касаллиги бўлгани сабабли ниқоб бир ишга ярайди, деб умид қилинмоқда.
Ҳозиргача фақат сил касаллиги билан оғриган беморларда синаб кўрилган ниқоблар ўлим хавфини 90 фоизлик натижа билан аниқлаган. Тадқиқотчилар мазкур турдаги ниқоб коронавирусда ҳам ёрдам беради, деб ўйлашмоқда.
