Россияда коронавирус инфекциясини даволаш учун препарат тақдим этилди
Хабарда таъкидланишича, "Фармзащита" илмий-ишлаб чиқариш маркази даволаш схемасини хитой ва француз тажрибасини инобатга олган ҳолда ишлаб чиққан.
Sputnik ахборот агентлиги хабарига кўра, Федерал тиббий-биологик агентлик коронавирус инфекциясини даволаш учун препаратни тақдим этди. У безгакка қарши мефлохин препарати асосида яратилган, деб хабар қилмоқда РИА Новости.
Хабарда таъкидланишича, "Фармзащита" илмий-ишлаб чиқариш маркази даволаш схемасини хитой ва француз тажрибасини инобатга олган ҳолда ишлаб чиққан.
"Юқори селективликка эга препарат коронавируснинг ҳужайраларда тарқалиш таъсирини блоклайди ва кўпайишини олдини олади, мефлохиннинг иммуносупрессив ҳаракати эса вирус туфайли жавобан келиб чиқадиган яллиғланиш ҳолати фаоллашувига тўсқинлик қилади. Маклорид антибиотиклар ва синтетик пенициллинларнинг қўшилиши иккиламчи бактериал-вирус синдроми шаклланишига тўсқинлик қилибгина қолмай, балки қонда ва ўпкада вирусга қарши воситанинг концентрация даражасини ошириш имконини беради", - деб айтган ФТБА раҳбари Вероника Скворцова.
Шифокор таъкидига кўра, бу турли даражадаги оғирликда COVID-19 билан касалланган беморларни самарали даволашини таъминлайди.
Бундан ташқари, мефлохин асосида коронавирус профилактикаси бўйича таъсирчан ва хавфсиз ишланмани яратиш бўйича ишлар олиб борилаяпти, дея аниқлик киритмоқда агентлик матбуот-хизмати.
Ушбу ишланмани Соғлиқни сақлаш тавсиялари рўйхатига киритиш таклиф қилинмоқда.
Бутунжаҳон соғлиқни сақлаш ташкилоти 11 март куни Хитойдан тарқалган янги турдаги COVID-19 коронавирус инфекцияси эпидемиясини пандемия, деб эълон қилган эди. БССТнинг сўнгги маълумотларига кўра, бутун дунё бўйича 510 мингдан зиёд киши ушбу вирусни юқтирган, 23,5 минг инсон вафот этган.
Ўлим ҳолатлари бўйича Италия, Испания ва Хитой биринчи учликда турибди.
Россияда коронавирусга чалинганларнинг умумий сони 1264 нафарга етди (уларнинг 817 таси Москвада), 49 киши тузалган, тўрт киши ўлган.
