İran-İraq iqtisadi əlaqələri üçün yol xəritəsi lazımdır

İran İslam Respublikası Məclisinin sədri təhlükəsizlik və iqtisadiyyatın bir-birini tamamlayan və ayrılmaz amillər olduğunu bildirərək deyib: “İran və İraq arasında ikitərəfli əlaqələrin dəqiq hazırlanmış yol xəritəsi əsasında inkişaf etdirilməsi regiona və xüsusilə ərəb ölkələri başda olmaqla İslam ölkələrinə təsir göstərə bilər

Parstoday-ın məlumatına görə, İran və İraq iqtisadi fəallarının iştirakı ilə fikir mübadiləsi toplantısı İran İslam Respublikası Məclisinin sədri Məhəmməd Baqir Qalibaf və onu müşayiət edən parlament nümayəndə heyətinin iştirakı ilə Bağdaddakı İran səfirliyində keçirilib.

Qalibaf toplantıda özəl sektor nümayəndələrinin fəaliyyətinin əhəmiyyətinə toxunaraq bildirib: “Hər iki ölkədə özəl sektor sahəsində bəzi problemlər institusional xarakter alıb. Bu səbəbdən sizin Tehrana səfəriniz zamanı İran Ticarət Palatasının məsul şəxslərinin iştirakı ilə daha bir görüş keçirəcəyik ki, problemləri prioritetləşdirilmiş və praktiki şəkildə həll edək.”

O, İranın sərhəd şəhərlərində yaşayan ağıllı, bacarıqlı və istedadlı işçi qüvvəsinə diqqət çəkərək əlavə edib: “Hər iki ölkə onların texniki və peşəkar imkanlarından yararlana bilər. Xüsusilə dost ölkəmiz İraq bu potensialdan istifadə edə bilər. Bunun üçün iki ölkə arasında iqtisadi və ticarət sahəsində düzgün və dəqiq yol xəritəsi hazırlanmalıdır.”

Məclis sədri çıxışının davamında bildirib ki, İran və İraq təxminən yarım əsrdir “nə müharibə, nə də sülh” və eyni zamanda “həm müharibə, həm də sülh” şəraitində yaşayırlar və bu vəziyyət artıq daimi xarakter alıb. O deyib: “İnsan nə qədər yaşayır ki, ömrünün 50 ili belə bir şəraitdə keçsin?! Bu arada bəzi qüvvələr təxribat xarakterli iddialar irəli sürərək deyirlər ki, bu vəziyyəti biz yaratmışıq. Halbuki bu vəziyyəti, İranın, İraqın və regiondakı digər İslam ölkələrinin insan resurslarını, təbii sərvətlərini və geosiyasi imkanlarını görərək onlara tamah salan düşmən yaradıb.”

Qalibaf əlavə edib ki, məsələn, Hörmüz boğazı, Fars körfəzi, Babül-Məndəb və Aralıq dənizindəki Süveyş kanalının coğrafi mövqeyi elədir ki, dünya dəniz nəqliyyatının əsas hissəsini təşkil edən təxminən 75 faizlik marşrutlar müsəlman ölkələrinin nəzarətindədir. Onun sözlərinə görə, bu, İslam dünyasının mühüm xüsusiyyətlərindən biridir.

Məclis sədri iranlı və iraqlı iqtisadi fəallara müraciətlə bildirib: “Müsəlman ölkələrinin resurslarına və xammal ehtiyatlarına diqqətlə nəzər salsanız, düşmənlərimizin onları talamaq üçün gəldiyini görərsiniz. Buna görə də mövcud şəraitdə ədalətsiz sanksiyalardan çıxış yolları üçün əvvəlcədən planlaşdırma aparmalı və bu maneələri dəf etməliyik.”

İran İslam Respublikası Məclisinin sədri bildirib ki, hazırda parlament rəhbəri vəzifəsində olsa da, icra məsələlərini bütünlüklə anlayır və işin texniki tərəfini yaxşı bilir. O əlavə edib: “Buna görə sizin problemlərinizi də bilirəm. Məsələn, mühəndislik xidmətləri ilə bağlı bank zəmanəti məsələsini asanlıqla həll etmək mümkündür.”

Qalibaf vurğulayıb ki, ticarət mübadilələrini milli valyutalarla həyata keçirmək və bununla ABŞ dollarının təsirini azaltmaq mümkündür. O deyib: “ABŞ-ın dünyaya hökmranlıq etdiyi dövr artıq geridə qalıb. Lakin biz buna diqqət yetirmir və yaranmış imkanları nəzərə almırıq. Problem də məhz bundadır. Biz dövrün tələblərinə uyğunlaşa bilməmişik və hələ də ticarəti 50 il əvvəlki üsullarla aparırıq.”