İran hər zaman bizim yanımızdadır, Tehranla ittifaqımızla fəxr edirik

Hizbullahın Livan parlamentindəki “Müqavimətə Sədaqət” fraksiyasının yüksək səviyyəli üzvü Hüseyn əl-Hac Həsən regionda İranın yaratdığı yeni qüvvələr nisbətinə toxunaraq bildirib ki, İran hər zaman Hizbullahın yanında olub və Tehranla ittifaq onlar üçün qürur mənbəyidir

“Pars Today”in “Tasnim” xəbər agentliyinə istinadən verdiyi məlumata görə, Livan parlamentində Bəəlbək-Hermel fraksiyasının rəhbəri və “Müqavimətə sədaqət” fraksiyasının yüksək səviyyəli üzvü Hüseyn əl-Hac Həsən bazar günü Livan və regionda baş verən son hadisələrlə bağlı açıqlamasında bildirib ki, təslim olmaq “Hizbullah”ın lüğətində yoxdur və biz davamlılıq və müqavimət yolunu davam etdirəcəyik.

Hüseyn əl-Hac Həsən vurğulayıb ki, “Hizbullah” İranla ittifaqı ilə fəxr edir və İran həmişə bizim dayağımız olub, bu gün də dayağımızdır və gələcəkdə də olacaq. “Hizbullah” İrana, onun gücünə və əldə etdiyi nailiyyətlərə arxalanması ilə fəxr edir.

O əlavə edib: “Bu gün İran Hörmüz boğazına, neftin qiymətinə və dünya iqtisadiyyatına nəzarət edir. Bu, bizim və İranın müttəfiqlərinin əlində olan silahdır və biz bundan öz şərtlərimizi qəbul etdirmək üçün istifadə edəcəyik.”

“Hizbullah” nümayəndəsi İranla ABŞ arasında qarşıdurma ilə bağlı son hadisələr barədə bildirib ki, bu döyüş hələ qəti nəticə ilə başa çatmayıb, lakin Tehran heç vaxt təslim olmayacaq və malik olduğu təzyiq rıçaqlarından əl çəkməyəcək.

Hüseyn əl-Hac Həsən qeyd edib ki, Vaşinqton döyüş meydanında əldə edə bilmədiklərini siyasət, iqtisadiyyat və diplomatiya vasitəsilə əldə etməyə çalışır. Lakin ABŞ Prezidenti Donald Tramp dünyanı İrana qarşı səfərbər etməkdə uğursuz olub və gördüyümüz kimi, Rusiya, Çin və digər ölkələr İrana qarşı iqtisadi müharibədə iştirak etməkdən imtina ediblər.

Livan parlamentinin deputatı daha sonra ABŞ-ın İranla müharibədə hərbi arsenalının tükənməsinə toxunaraq bildirib ki, müqavimət qüvvələri amerikalıların və sionistlərin əsas və real məqsədinin — müqaviməti məhv etmək məqsədinin — qarşısını almağa nail olublar.

O qeyd edib ki, “Hizbullah” ABŞ və İsrail rejiminin rəhbərlik etdiyi “şər oxu”na qarşı İranın rəhbərlik etdiyi regional tənliyin mühüm hissəsidir. “Biz öz yolumuzu davam etdirəcəyik və görəcəyik ki, bu yol bizi hara aparır. Siz də öz yolunuzu davam etdirin və görün, hara gəlib çıxırsınız.”