طالبان: در حملات بر مکان‌های دینی در افغانستان شهروندان تاجیکستان و پاکستان دست دارند
سرپرست وزارت دفاع طالبان می‌گوید: در حملاتی‌که بر «مساجد، خانقاه‌ها، مدارس دینی و عالمان دین» در افغانستان صورت گرفته است، شهروندان خارجی به‌ویژه اتباع تاجیکستانی دست دارند.
به گزارش ذبیح الله قریشی خبرنگار رادیو دری، محمدیعقوب مجاهد افزود: در درجه دوم در «تنظیم» بسیاری از حملات در افغانستان اتباع پاکستانی نیز دست داشته‌اند.
محمدیعقوب مجاهد افزوده است که در مدت ۱۲ ماه گذشته ده‌ها شهروند تاجیکستان به اتهام‌های مختلف از سوی طالبان کشته و صدها تن دیگر بازداشت شده‌اند.
محمدیعقوب مجاهد افزوده است: «برخی از حلقات مغرض با ایجاد نگرانی از افغانستان برای کشورهای منطقه و جهان می‌خواهند که سود مادی به‌دست بیاورند تا به اهداف شوم‌شان برسند.»
به گفته وی، سازمان ملل متحد و برخی از نهادها گزارش‌های «کاذب این حلقات» را باور می‌کنند.
بااین حال، سرپرست وزارت دفاع طالبان از کشورهای منطقه خواست تا مرزهای زمینی و هوایی‌شان را به شدت کنترل کنند.
این اظهارات درحالی مطرح می‌شود که کشورهای منطقه به‌ویژه تاجیکستان و پاکستان همواره از حضور گروه‌های تروریستی در افغانستان تحت تسلط طالبان ابراز نگرانی کرده‌اند.
