Առաքելյան. «Վրաստանի նախաձեռնած ծրագիրը մեծ կարևորություն ունի Հայաստանի համար»
Վրաստանը նախաձեռնել է ճանապարհաշինության խոշոր ծրագիր, սակայն պետք է հիշել, որ ամռան ամիսներին Հայաստանի ու Վրաստանի միջև ուղևորահոսքն ավելանում է:
ՍԱԹԻ ընկերության տնօրեն Մակար Առաքելյանը Sputnik Արմենիայի հետ զրույցում խոսել է Վրաստանում մոտ 23 կիլոմետրանոց ճանապարհի նախագծի իրականացման մասին, և թե որքանով կարող է այդ նոր ծրագիրը թեթևացնել Լարսի անցակետի ծանրաբեռնվածությունը։
Ըստ Առաքելյանի՝ չպետք է մոռանալ, որ այդ ճանապարհից հետո Լարսի մաքսակետի թողտվությունը պետք է մեծացնել։ Հատկապես ամռան ամիսներին, երբ տուրիստական հոսքը դեպի Հայստան ու Վրաստան ավելանում է, այնտեղ մեծ կուտակումներ են լինում։
«Ճանապարհի թողտվությունը մոտ 170 մարդատարի և մոտ 30 բեռնատարի համար է նախատեսված»,–նշում է Առաքելյանը։
Ըստ Առաքելյանի՝ ճանապարհի շինաշխատանքները կտևեն մոտ 3–4 տարի։
«Վրաստանի նախաձեռնած ծրագիրը մեծ կարևորություն ունի ՀՀ համար, սակայն այլընտրանքը միշտ էլ պետք է»,–համոզված է ՍԱԹԻ ընկերության տնօրենը։
Հիշեցնենք, որ Վրաստանի իշխանությունը մտադիր է կառուցել մոտ 23 կիլոմետրանոց ճանապարհ, վեց կամուրջ ու հինգ թունել, որոնց թվում է Խաչի լեռնանցքի տակով անցնող 9 կիլոմետրանոց թունելը։
Նախագիծը կարժենա 3․5 միլիարդ դոլար։ Վրաստանի վարչապետ Մամուկա Բախտաձեն հայտարարել էր, որ նախագծի շինարարությունը կսկսվի 2019 թվականի վերջին։
armeniasputnik.am
