2008 թվականին ոստիկանությունը չէր ենթարկվում նախագահին, այժմ ենթարկվում է վարչապետին. Ռոբերտ Քոչարյան
2008 թվականին ոստիկանությունը չէր ենթարկվում նախագահին, այժմ ենթարկվում է վարչապետին: Այս մասին դատարանում հայտարարեց ՀՀ երկրորդ նախագահ Ռոբերտ Քոչարյանը՝ մեկնաբանելով տուժող կողմի ներկայացուցիչ Սեդա Սաֆարյանի հայտարարությունները:
«Ես չէի ծրագրում ելույթ ունենալ, պարզապես ցանկանում եմ պատասխանել հնչած երկու պնդումներին: Դատախազը փորձեց պարզաբանել, թե ինչ է նշանակում սահմանադրական կարգի տապալում: Նա օրինակ բերեց հավաքների անցկացման սահմանափակումը: Ենթադրում եմ, որ նկատի ունի իմ կարգադրությունը, որով արտակարգ դրություն եւ սահմանափակումներ են մտցվել:
Սակայն սահմանափակումները տարածվել են միայն Երեւանի վրա, ինչպես եւ մյուս բոլոր սահմանափակումները: Հարց է առաջանում՝ կարելի՞ է արդյոք երկրում, որտեղ հազարավոր համայնքներ կան, մեկ համայնքում սահմանափակումները սահմանադրական նորմերի խախտում համարել: Կարծում եմ՝ պատասխանը պարզ է:
Եվ երկրորդ՝ Սեդա Սաֆարյանը հայտարարեց, որ ոստիկանությունը ենթարկվել է նախագահին: Ես կարծում եմ, որ իրավաբանը պետք է լավ իմանա այդ ժամանակ գործող Սահմանադրությունը: Այժմ ոստիկանությունը ենթարկվում է անմիջապես վարչապետին: Նախագահը նման լիազորություններ այն ժամանակ չուներ: Ծանոթացեք Սահմանադրությանը»,- նշեց նախկին նախագահը:
Նա հիշեցրեց, որ այն ժամանակ նախագահը չուներ հասարակական կարգի հետ կապված որեւէ գործառույթ: «Ես չէի խոսի, եթե չլինեի հասարակության դահլիճում: Ստիպված եմ նման բնույթի ուղղումներ անել»,- եզրափակեց նախկին նախագահը:
news.am
