Սանկտ Պետերբուրգում մեկնարկել է Սարգսյան-Պուտին հանդիպումը
Ռուսաստանի Սանկտ Պետերբուրգ քաղաքում` Կոնստանտինյան պալատում, մեկնարկել է ՀՀ նախագահ Սերժ Սարգսյանի և ՌԴ Նախագահ Վլադիմիր Պուտինի հանդիպումը: Այս մասին Twitter-ի իր միկրոբլոգում գրել է ՀՀ նախագահի մամուլի խոսնակ Վլադիմիր Հակոբյանը:
Նշենք, որ այսօր՝ հունիսի 20¬-ին, ավելի ուշ տեղի է ունենալու նաեւ Հայաստանի, Ռուսաստանի եւ Ադրբեջանի նախագահների եռակողմ հանդիպումը:
Հիշեցնենք, որ Ռուսաստանի նախագահ Վլադիմիր Պուտինը հունիսի 20-ին Պետերբուրգում առանձին հանդիպումներ է անցկացնելու Հայաստանի ու Ադրբեջանի նախագահներ Սերժ Սարգսյանի ու Իլհամ Ալիեւի հետ, իսկ հետո հանդիպումը անցնելու է եռակողմ ձեւաչափով:
Ավելի վաղ ՌԴ նախագահի մամուլի քարտուղար Դմիտրի Պեսկովը հայտնել էր, որ «Հանդիպման հիմնական նպատակն է ապահովագրվել մարտական գործողությունների վերսկսումից, թույլ չտալ որ կորեն այն մշակումները, որոնք եղել են Ղարաբաղում բռնության վերսկսման պահին»: Նա նշել ր, որ բանակցությունները բարդ են լինելու:
Ապրիլի սկզբին Ադրբեջանի կողմից Արցախի դեմ սանձազերծած քառօրյա պատերազմից հետո Սարգսյան-Ալիեւ առաջին հանդիպումը տեղի էր ունեցել Վիեննայում մայիսի 16-ին` ԵԱՀԿ Մինսկի խմբի համանախագահող երկրների արտաքին գործերի նախարարների նախաձեռնությամբ եւ ԱՄՆ պետքարտուղար Ջոն Քերիի, ՌԴ արտգործնախարար Սերգեյ Լավրովի, Ֆրանսիայի եվրոպական հարցերով պետքարտուղար Արլեմ Դեզիրի նախաձեռնած մասնակցությամբ:
