Երուսաղեմի հայոց պատրիարքությունը խնդրում է վեհափառին Ազգային եկեղեցական ժողով հրավիրել
Երուսաղեմի հայոց պատրիարք Նուրհան արքեպիսկոպոս Մանուկյանի հրավերով գումարվել է արտահերթ Միաբանական ընդհանուր ժողով (ՄԸԺ)՝ «Մայր Աթոռ Սուրբ Էջմիածնի և Ամենայն հայոց հայրապետի շուրջ կատարվող իրադարձությունները» օրակարգով։
Սրբոց Հակոբեանց միաբանական ընդհանուր ժողովի տարածած հաղորդագրության մեջ նշվում է, որ միաբանները լիակատար աջակցություն են հայտնում Մայր աթոռ Սուրբ Էջմիածնին և Ազգային եկեղեցական ժողովով ընտրված Ամենայն հայոց հայրապետին: Ընդգծվում է՝ վեհափառ հայրապետի անվան հիշատակումը Սուրբ պատարագների ընթացքում նույն ժողովի իրավական պահանջն է:
«Հայաստանյայց առաքելական սուրբ եկեղեցին, համաձայն Հայաստանի Հանրապետության Սահմանադրության, ինքնակառավարվող հաստատություն է և անջատ է պետությունից: Ներկա կառավարության միջամտությունը եկեղեցու գործունեությանը հակասում է Սահմանադրական կարգին: Հայաստանյայց առաքելական սուրբ եկեղեցուն վերաբերող յուրաքանչյուր խնդիր պետք է լուծվի համաձայն նրա կանոնների: Ըստ այդ կանոնների՝ միակ մարմինը, որ իրավասու է այդ խնդիրները քննելու և որոշում կայացնելու, Ազգային եկեղեցական ժողովն է»,- նշված է հաղորդագրության մեջ։
Ժողովը դիմում է վեհափառին՝ խնդրելով Ազգային եկեղեցական ժողով հրավիրել՝ քննելու ստեղծված իրավիճակի հանգուցալուծումը։
