Ալիևը հայտարարել է Հայաստանի էներգետիկ անվտանգության ոլորտում «զգալի ավանդի» մասին
Ադրբեջանից մատակարարվող բենզինն ու դիզելային վառելիքը «զգալի ավանդ են դարձել Հայաստանի էներգետիկ անվտանգության գործում»։ Նմանատիպ կարծիք է հայտնել Ադրբեջանի նախագահ Իլհամ Ալիևը, փոխանցում են տեղական ԶԼՄ-ները։
Բեռլինում Գերմանիայի կանցլեր Ֆրիդրիխ Մերցի հետ համատեղ մամուլի ասուլիսի ժամանակ Ալիևը հայտարարել է, որ «հայ-ադրբեջանական հարաբերությունների կարգավորումից, խաղաղության համաձայնագրի նախագծի նախաստորագրումից և ԱՄՆ նախագահ Դոնալդ Թրամփի մասնակցությամբ Սպիտակ տանը Համատեղ հռչակագրի ստորագրումից հետո փաստացի վերջ է դրվել ավելի քան 30 տարի տևած հակամարտությանը»։
«Այդ համաձայնագրից անմիջապես հետո Ադրբեջանն անցել է գործնական քայլերի։ Այսօր Ադրբեջանի կողմից Հայաստանին մատակարարվող բենզինն ու դիզելային վառելիքը շատ մեծ ավանդ են Հայաստանի էներգետիկ անվտանգության գործում։ Հատկապես հաշվի առնելով, որ այսօր որոշակի պատճառներով նավթամթերքի ներկրման ու արտահանման լուրջ խնդիրներ կան։ Ադրբեջանի տարածքով դեպի Հայաստան տարանցիկ բեռների փոխադրումը լայն թափ է ստացել։ Մինչ օրս ավելի քան 40 հազար տոննա բեռ է անցել Ադրբեջանի տարածքով»,- հավելել է նա։
