Իրանն ու Հայաստանը ձգտում են համատեղ միջանցքը վերածել տարածաշրջանային առևտրի շարժիչի

Տրանսպորտային դիվանագիտության իրականացման և տարածաշրջանային առևտրի զարգացման համատեքստում, ՀՀ տարածքային կառավարման և ենթակառուցվածքների փոխնախարարը հանդիպել է Իրանի ճանապարհների և քաղաքաշինության նախարարի տեղակալ, Իրանի ճանապարհների սպասարկման և ավտոմոբիլային տրանսպորտի կազմակերպության ղեկավարի հետ։ Կողմերը քննարկել են երկու երկրների միջև միջազգային ավտոմոբիլային տրանսպորտի համագործակցության զարգացման ուղիները։

Ինչպես հաղորդում է IRNA լրատվական գործակալությունը՝ հղում անելով Իրանի ճանապարհների սպասարկման և ավտոմոբիլային տրանսպորտի կազմակերպության հասարակայնության հետ կապերի բաժնին, հանդիպմանը մասնակցել են նաև Իրանի ԱԳ նախարարության և ճանապարհների ու քաղաքաշինության նախարարության միջազգային գործերի կենտրոնի ներկայացուցիչներ, ինչպես նաև կազմակերպության տրանզիտի և միջազգային տրանսպորտի բաժնի ղեկավարի պաշտոնակատարը։ Քննարկումների ընթացքում կողմերը ընդգծել են տրանզիտային ենթակառուցվածքների ամրապնդման և առկա խոչընդոտների վերացման ուղղությամբ իրենց վճռականությունը։

Իրանի ճանապարհների և քաղաքաշինության նախարարի տեղակալ,   ճանապարհների սպասարկման և ավտոմոբիլային տրանսպորտի կազմակերպության ղեկավար Ռեզա Աքբարին, անդրադառնալով Իրանի Իսլամական Հանրապետության բարձրագույն ղեկավարության վճռական կամքին՝ Հայաստանի հետ առևտրային և միջազգային տրանսպորտային համագործակցությունը զարգացնելու ուղղությամբ, նշել է, որ Հայաստանում անցկացված տրանսպորտային հարցերով նիստերի և երկու երկրների նախարարների մակարդակով ինտենսիվ բանակցությունների արդյունքում պատրաստվել է համապարփակ փոխըմբռնման հուշագրի նախագիծ։

Նրա խոսքով՝ այս նախագիծը կենտրոնացած է այնպիսի առանցքային ուղղությունների վրա, ինչպիսիք են ենթակառուցվածքների զարգացումը, սահմանային անցակետերում խոչընդոտների վերացումը, ավտոճանապարհային վճարների նվազեցումը կամ վերացումը և երկու երկրների տարածքներում տրանզիտային փոխադրամիջոցների ընդունման կարողությունների ավելացումը։

Ընդգծելով Իրանի և հարևան երկրների միջև առևտրային փոխանակումների մեծ ներուժը, Աքբարին նշել է, որ  տարածաշրջանում զուգահեռ միջանցքների գործարկումը և Իրան–Հայաստան–Վրաստան տրանսպորտային միջանցքի լիարժեք ակտիվացումը կարող է զգալիորեն մեծացնել ապրանքաշրջանառության ծավալը, ինչը որոշիչ դեր կխաղա տարածաշրջանային մատակարարման շղթայում։

Հանդիպման ընթացքում Հայաստանի տարածքային կառավարման և ենթակառուցվածքների նախարարի տեղակալ Քրիստինե Ղալեչյանը, ողջունելով Իրանի հետ տնտեսական և տրանսպորտային համագործակցության ընդլայնումը, տեղեկացրել է ենթակառուցվածքային ծրագրերի առաջընթացի մասին։

Նա նշել է, որ տրանզիտային ենթակառուցվածքների զարգացումը ընթանում է ճիշտ ուղղությամբ, և իրականացվող քայլերը արդյունավետորեն կնպաստեն վարորդների խնդիրների նվազեցմանը, տրանզիտային փոխադրամիջոցների տեղաշարժի դյուրացմանը և սահմանային լոգիստիկայի բարելավմանը։

Ղալեչյանը, հիշատակելով երկու երկրների բարձր մակարդակի պաշտոնյաների միջև նախկինում կայացած մասնագիտական հանդիպումները, հավելել է, որ մոտ ապագայում նախատեսվում է կողմերի պաշտոնյաների միջև նոր մասնագիտական նիստ, որի ընթացքում մանրամասն կքննարկվեն փոխըմբռնման հուշագրում ներառված առաջարկները և երկկողմ համագործակցության զարգացման գործնական մեխանիզմները։ Բանակցությունների արդյունքները կհայտարարվեն դիվանագիտական ուղիներով։