Մոսկվայի նախազգուշացումը Հայաստանին․ Ռուսաստանի տնտեսական շահերին վնասելը անհետևանք չի մնա

Ռուսաստանի բարձրաստիճան պաշտոնյաները, արձագանքելով Հայաստանի տնտեսական քաղաքականությանն ու նոր մոտեցումներին, նախազգուշացրել են, որ այդ երկրում Ռուսաստանի շահերին, ակտիվներին և ընկերություններին ցանկացած վնաս հասցնելուն Մոսկվան արձագանքելու է։

Ըստ Tasnim լրատվական գործակալության, Ռուսաստանի արտաքին գործերի նախարարի տեղակալ Միխայիլ Գալուզինը, մատնանշելով Ռուսաստանի ներդրումների անվտանգության վերաբերյալ Հայաստանի պաշտոնյաների հայտարարությունների և որոշ գործնական քայլերի միջև առկա հակասությունը, ընդգծել է, որ Մոսկվան ուշադիր հետևում է իր տնտեսական ոլորտի ներկայացուցիչների հետ կապված զարգացումներին ։
Ռուսաստանի Անվտանգության խորհրդի քարտուղարի տեղակալ Ալեքսեյ Շուցովը նույնպես պնդել է, որ Հայաստանում փորձեր են իրականացվում Ռուսաստանի ակտիվները վարկաբեկելու և դրանց արժեքը նվազեցնելու ուղղությամբ, որպեսզի ռուս սեփականատերերը ճնշումների ներքո ստիպված լինեն հրաժարվել այդ ակտիվներից։ Նա նախազգուշացրել է, որ ռուսական արդյունաբերական և ենթակառուցվածքային ընկերությունները կարող են դառնալ այս քաղաքականության հաջորդ թիրախը։ Նրա խոսքով՝ ռուսական ընկերությունները Հայաստանում տասնյակ հազարավոր աշխատատեղեր են ստեղծել և կարևոր ներդրում ունեն երկրի համախառն ներքին արդյունքի ձևավորման գործում, ուստի դրանց դուրսմղումը կարող է վնաս հասցնել Հայաստանի տնտեսությանը։
Տարաձայնությունների կարևորագույն թեմաներից մեկը Հայաստանի երկաթուղային ցանցի կառավարումն է։ «Հարավկովկասյան երկաթուղի» ընկերությունը, որը «Ռուսական երկաթուղիներ» պետական ընկերության ենթակա ձեռնարկություն է, 2008 թվականից ղեկավարում է Հայաստանի երկաթուղային գծերը, սակայն վերջին ամիսներին Երևանն առաջարկել է այս ընկերության 30-ամյա կոնցեսիայի կառավարումը փոխանցել երրորդ երկրի։ Հայաստանը կարծում է, որ Ռուսաստանի դեմ արևմտյան պատժամիջոցները նվազեցրել են իր տարանցիկ առավելությունները։ Ռուսաստանը դեմ է այդ փոխանցմանը և հայտարարել է, որ պայմանագրի միակողմանի դադարեցման դեպքում Հայաստանը պետք է փոխհատուցի կատարված ներդրումները։ Փոխհատուցման գումարը գնահատվում է շուրջ 400 միլիոն դոլար։
Միջուկային էներգետիկան նույնպես երկու երկրների հարաբերություններում դարձել է քննարկման մեկ այլ թեմա։ Հայաստանը մտադիր է մինչև 2027 թվականի վերջը որոշել նոր ատոմակայանի տեխնոլոգիան և դիտարկում է փոքր մոդուլային ռեակտորների կիրառման հնարավորությունը։ Սակայն դեռևս հստակ չէ, թե Ռուսաստանը, ԱՄՆ-ը կամ Ֆրանսիան կլինեն այս նախագծի վերջնական գործընկերը։ Նիկոլ Փաշինյանն ասել է, որ տեխնոլոգիայի ընտրությունը կատարվելու է տնտեսական և տեխնիկական նկատառումներով։
Գազի ոլորտում ևս «Գազպրոմ Արմենիա»-ն շարունակում է ունենալ Հայաստանի բնական գազի մատակարարման և բաշխման մենաշնորհը։ Ըստ հայ վերլուծաբանների՝ Հայաստանի մեծ կախվածությունը ռուսական գազից կարևոր խոցելիություն է։ Նրանք նախազգուշացնում են, որ Ռուսաստանի հայտարարությունները հնարավոր սուբսիդիաների վերացման և շուկայական գների անցնելու մասին կարող են էական տնտեսական և սոցիալական ճնշում առաջացնել Հայաստանի վրա։