Իրանը հետաքրքրված է Չինաստանի հետ լուրջ և կառուցողական հարաբերություններով
Իրանը հետաքրքրված է Չինաստանի հետ լուրջ և կառուցողական համագործակցությամբ, մասնավորապես՝ «Մեկ գոտի, մեկ ճանապարհ» ռազմավարական նախաձեռնության շրջանակներում։
Ինչպես տեղեկացնում է IRNA գործակալությունն՝ այս մասին հայտարարել է ԻԻՀ նախագահ Մասուդ Փեզեշքյանը:
Օգոստոսի 28–ին Փեզեշքյանի գլխավորությամբ տեղի է ունեցել հանդիպում՝ քննարկելու Իրան-Չինաստան հարաբերությունների տարբեր ուղղություններ և ուրվագծելու Չինաստան կատարելիք իր առաջիկա այցի օրակարգը:
Նիստին մասնակցել են համապատասխան կազմակերպությունների բարձրաստիճան պաշտոնյաներ։ Հանդիպման ընթացքում քննարկվել են Թեհրանի և Պեկինի միջև երկկողմ հարաբերությունների հիմնական բաղադրիչները և համագործակցության ոլորտները։
ԻԻՀ նախագահը Իրան-Չինաստան հարաբերությունները բնութագրել է որպես ռազմավարական՝ ընդգծելով Իրանի դերը որպես Չինաստանի հուսալի գործընկեր քաղաքական, տնտեսական և միջազգային ոլորտներում:
Նախատեսվում է, որ Փեզեշքյանը Չինաստան կմեկնի օգոստոսի 31-ին՝ մասնակցելու և ելույթ ունենալու Շանհայի համագործակցության կազմակերպության գագաթնաժողովին:
