Washington Post․ Արևմտյան Ասիայի ճահիճը Թրամփի համար ավելի է խորացել

Ամերիկյան Washington Post թերթը, ընդունելով Թրամփի վարչակազմի վրա ճնշումների սաստկացումը, գրել է, որ տարածաշրջանում Իրանի դաշնակիցների առաջխաղացումները խորացրել են Արևմտյան Ասիայի ճահիճը ԱՄՆ նախագահի համար և ավելի են սահմանափակել Վաշինգտոնի՝ այս ճգնաժամից դուրս գալու հնարավորությունները։

Pars Today-ը, վկայակոչելով IRIB-ին, հաղորդում է, որ ըստ Washington Post-ի՝ Իրանի դեմ պատերազմից վեց ամիս անց Թրամփը ոչ միայն չի գտել այս ճահճից դուրս գալու ճանապարհ, այլև Հորմուզի և Բաբ էլ-Մանդեբի նեղուցները՝ աշխարհի էներգակիրների փոխադրման երկու կենսական ուղիները, փաստացի հայտնվել են Թեհրանի ազդեցության ներքո։ Թերթը նաև պնդել է, որ Սաուդյան Արաբիայի արևելք-արևմուտք նավթամուղը, որը կառուցվել էր Հորմուզի նեղուցը շրջանցելու համար, թիրախավորվել է։
Washington Post-ի հաղորդմամբ՝ այս իրավիճակի հետևանքները տարածվել են նաև էներգետիկ շուկայի վրա․ նավթի գինը մոտ 70 դոլարից հասել է 105 դոլարի։ Միաժամանակ ԱՄՆ-ում բենզինի գինը մոտ 3 դոլարից բարձրացել է մինչև 4 դոլար 30 ցենտի, իսկ համաշխարհային տնտեսության վրա ճնշումն ավելի է սրվել։
Թերթը, անդրադառնալով ԱՄՆ-ի զինամթերքի կարևոր պաշարների նվազմանը և տարածաշրջանում ամերիկյան ռազմակայանների դեմ շարունակվող սպառնալիքին, հավելել է, որ Վաշինգտոնը ռազմական տարբերակից անցել է տնտեսական ճնշման արշավի։ Այնուամենայնիվ, Թեհրանը շարունակում է մնալ ուժեղ դիրքում, իսկ Իրանի դաշնակիցների վերջին հաջողությունները մեծացրել են Իրանի Իսլամական Հանրապետության ճնշման լծակները։