Շիրազը՝ Կազանի Կրեմլում. իրանական մշակույթը Ռուսաստանում
Ռուսաստանի Թաթարստանի Հանրապետության կենտրոն Կազանի Կրեմլի զբոսաշրջային համալիրում բացվել է Իրանի հարավում գտնվող Շիրազ քաղաքի պատմական, մշակութային և կրոնական տեսարժան վայրերի լուսանկարչական ցուցահանդես։
Pars Today-ի փոխանցմամբ՝ ցուցահանդեսում ներկայացված են իրանցի լուսանկարիչների աշխատանքներ, այդ թվում՝ մշակութային և պատմական հուշարձանների՝ Շահ Չերաղ մզկիթի, Հաֆեզի և Սաադիի դամբարանների, Քարիմ Խան Զենդ միջնաբերդի, Պերսեպոլիսի, Փասարգադի, Վաքիլ և Նասիր օլ-Մոլք մզկիթների, շուկայի և Իրանի Ֆարս նահանգի մի շարք այլ բնական և մշակութային լանդշաֆտների լուսանկարները:
Լուսանկարներն այցելուներին ներկայացրել են իրանական քաղաքակրթությունը և Ֆարս նահանգի արվեստը։
Ցուցահանդեսը կազմակերպվել է Շիրազի և Կազանի քաղաքապետարանների համագործակցությամբ, որոնք ավելի վաղ ստորագրել էին քույր քաղաքների մասին հուշագիր։
Ցուցահանդեսը կգործի մինչև նոյեմբերի 20-ը։
Ցուցահանդեսի բացման արարողության ժամանակ Կազանում ԻԻՀ գլխավոր հյուպատոս Դավուդ Միրզախանին ծանոթացել է ներկայացված լուսնակարների հետ։ Նա ընդգծել է ազգերի միջև մշակութային փոխազդեցությունների կարևորությունը և նշել. «Նման ցուցահանդեսներն արդյունավետ դեր են խաղում իրանական մշակույթի, պատմության և արվեստի ներկայացման գործում և հանդես են գալիս որպես ազգերի միջև մշակութային կամուրջ։
Շիրազը, որպես Իրանի փայլուն մարգարիտ, իրանական պոեզիայի, գրականության և քաղաքակրթության խորհրդանիշ է, և նման ցուցահանդեսի անցկացումը Կազանում կարող է նպաստել երկու երկրների միջև փոխըմբռնման զարգացմանը և մշակութային ու զբոսաշրջային համագործակցության ընդլայնմանը»։
Միրզախանին հույս է հայտնել, որ նման միջոցառումների շարունակականությունը ենթահող կպատրաստի Իրանի և Թաթարստանի Հանրապետության միջև մշակութային և միջմարդկային հարաբերությունների հետագա ամրապնդման համար։
