Իրանը կոչ է արել միջազգային ընդդիմություն ցուցաբերել ԱՄՆ-ի միակողմանի պատժամիջոցներին
ՄԱԿ-ում ԻԻՀ մշտական ներկայացուցիչն այդ կազմակերպության գլխավոր քարտուղարին հղած նամակում պահանջել է դատապարտել Իրանի ժողովրդի դեմ ԱՄՆ-ի անօրինական ու միակողմանի պատժամիջոցները և ընդդիմանալ դրանց:
ԻՌՆԱ-ի հաղորդման համաձայն, Ղոլամալի Խոշռուն երկուշաբթի օրը Անտոնիո Գութերեշին հղած նամակում անդրադառնալով Իրանի դեմ ԱՄՆ-ի անօրինական ու միակողմանի պատժամիջոցներին, ՄԱԿ-ին ու միջազգային հանրության անդամներին կոչ է արել այս պատժամիջոցներին դիմակայող քայլեր ձեռնարկել:
ՄԱԿ-ում ԻԻՀ մշտական ներկայացուցիչն ԱՄՆ-ի քայլը դեմ համարելով միջազգային օրենքներին, հավելել է. «Այս պատժամիջոցներն անօրինական և դեմ են ՄԱԿ-ի կանոնադրությամբ ընդունված սկզբունքներին, այդ թվում՝ պետությունների իրավահավասարությանը, անդամ պետությունների ներքին հարցերին չմիջամտելուն, նաև տեղաշարժի ու միջազգային առևտրի ազատությանը»:
«ԱՄՆ-ն ոչ միայն բացահայտ կերպով ընդդիմանում է ԱԽ-ի թիվ 2231 բանաձևին, այլև անամոթաբար այլ երկրների վրա ճնշում է գործադրում՝ ոտնահարելու այդ բանաձևը»,-հայտարարել է Խոշռուն նկատելով, որ ԱՄՆ-ի պատժամիջոցները հակասում են Արդարադատության միջազգային դատարանի վճռին:
ՄԱԿ-ում Իրանի մշտական ներկայացուցիչն ընդգծել է. «Միջազգային հանրությունը պետք է հակադարձի ԱՄՆ-ի անօրինական ու անմարդկային այլ քայլին և պաշտպանի օրենքի իշխանությունն ու բազմակողմանիությունը»:
