Իրանը կաջակցի Սիրիայի տարածքային ամբողջականության պահպանմանը և ազգային ինքնիշխանության ամրապնդմանը
Իրանի ԱԳ նախարարության խոսնակն անդրադառնալով Սիրիայի հյուսիսային շրջանում ընթացող իրադարձությունների վերաբերյալ Ռուսաստանի ու Թուրքիայի միջև ձեռքբերված համաձայնությանն ընդգծել է.«Իրանը ողջունում է Սիրիայի տարածքային ամբողջականության պահպանմանը և ազգային ինքնիշխանության ամրապնդմանը նպաստող ցանկացած քայլ»:
Ռուսաստանի և Թուրքիայի նախագահները, երեքշաբթի օրը Սոչի քաղաքում ստորագրել են փոխըմբռնման հուշագիր՝ Սիրիայի հյուսիսային շրջանների անվտանգության իրավիճակի վերաբերյալ, որում ընդգծվել է Սիրիայի տարածքային ամբողջականության պահպանման անհրաժեշտությունը: «Բոլոր քուրդ աշխարհազորային միավորները դուրս կգան Մանբիջից և Թալ Ռաֆաթից». ասված է հուշագրում:
Իրանի ԱԳ նախարարության խոսնակ Սեյեդ Աբբաս Մուսավին, չորեքշաբթի օրը նշել է. «Իրանը Սիրիայի հյուսիսում բախումներին վերջ դնելու Ռուսաստան-Թուրքիա համաձայնությունը դրական քայլ է համարում տարածաշրջանում խաղաղության ու կայունության վերականգնման ուղղությամբ»:
Մուսավին հույս է հայտնել, որ այդ փոխըմբռնումը մի կողմից կփարատի Թուրքիայի անվտանգության հետ կապված մտահոգությունները և մյուս կողմից կնպաստի Սիրիայի տարածքային ամբողջականության պահպանմանը և ազգային ինքնիշխանության ամրապնդմանը:
«Տարածաշրջանի խնդիրները տարածաշրջանի երկրներն են կարող լուծել, և ամերիկյան ուժերի հեռանալը տարածաշրջանից կնպաստի խաղաղության ու անվտանգության վերականգմանը». ընդգծել է Մուսավին:
