Իրանի ԱԳՆ. Օտարերկրյա ռազմական ներկայությունը չի նպաստի տարածաշրջանի կայունությանը և անվտանգությանը
Իրանի ԱԳ նախարարն ասել է. «Սիրիայում օտարերկրյա ռազմական ներկայությունը չի նպաստի այս երկրի և տարածաշրջանի կայունությանն ու անվտանգությանը»:
Իրանի արտաքին գործերի նախարար Հոսեյն Ամիր Աբդոլլահյանը երկուշաբթի օրը Թեհրանում Սիրիայի արտգործնախարար Ֆեյսալ Մեղդադի հետ համատեղ մամուլի ասուլիսում նշել է. «Իրանը կշարունակի իր ջանքերն ու աջակցությունը՝ տարածաշրջանում խաղաղության և կայուն անվտանգության հասնելու համար»:
Դատապարտելով Սիրիայի տարածքի վրա Սիոնիստական ռեժիմի կրկնվող հարձակումները՝ Ամիր Աբդոլլահյանը հավելել է.-«Իսրայելի ռեժիմը տարածաշրջանում անկայունության հիմնական աղբյուրն է, քանի որ այս ռեժիմի արհեստական գոյատևումը պայմանավորված է տարածաշրջանում պատերազմ հրահրելով»։
Նշելով, որ տարածաշրջանի երկրներն անտարբեր չեն եղել և չեն լինելու Սիոնիստական ռեժիմի տեղաշարժերի նկատմամբ, Իրանի արտաքին գործերի նախարարն ասել է. -«Սիոնիստական ռեժիմի կեղծ կառավարիչները հասկացել են, որ սիոնիստների ոչ մի գործողություն անպատասխան չի մնա»։
Սիրիայի արտաքին գործերի նախարարը ևս նշելով,որ 2011 թվականից ի վեր շուրջ 400 հազար ահաբեկիչ մուտք է գործել Սիրիայի տարածք, ասել է,-«Ամերիկացի զինվորները Դեյր Էլ-Զորի շրջանում սպանել են մեծ թվով սիրիացիների: Թուրքական բանակը օկուպացրել է նաեւ Սիրիայի մի հատվածը»։
Ֆեյսալ Մեղդադն ընդգծել է. -«Օտարերկրյա ուժերը պետք է լքեն Սիրիայի տարածքը»:
