Իրանը շարունակում է Ջուլֆա-Քալալեհ ռազմավարական ճանապարհի կառուցումը
Իրանը շարունակում է Ջուլֆա-Քալալեհ ռազմավարական ճանապարհի և թունելների կառուցումը, այս միջազգային երթուղին չորս գոտուց բաղկացած ճանապարհի վերածելու նպատակով։
«Թավրիզ Բիդար» լրատվական կայքի փոխանցմամբ՝ Ջուլֆա-Քալալեհ ավտոմայրուղին սկիզբ է առնում Իրանի հյուսիս-արևմուտքում՝ Նախիջևանի Ինքնավար Հանրապետության մոտ գտնվող Ջոլֆայի սահմանային տերմինալից և Արաքս գետի ափերով ու Հայաստանի սահմանով անցնելուց հետո, հասնում է Ադրբեջանի սահմանին գտնվող Քալալեհի սահմանային տերմինալ: Իրանի կառավարության կողմից հաստատված ծրագրերի համաձայն՝ թունելների կառուցման արդյունքում, այս ավտոմայրուղու վերադարձի երթուղին կունենա չորս գոտի։
Լեռնային Ղարաբաղի երկրորդ պատերազմի ավարտից հետո, դեպի Նախիջևան և Թուրքիա մուտքի ուղի ստեղծելու Ադրբեջանի ծրագրի առկայության պայմաններում, կարևորելով տարածաշրջանի անվտանգության և հարևան երկրների հետ մերձեցման կարևորությունը, Իրանը կառուցում է նոր մայրուղի, որի մի մաս կազմում է Ջուլֆա-Քալալեհ մայրուղին։
Այս միջազգային ճանապարհը ռազմավարական և առևտրային մեծ նշանակություն ունի և կարևոր դեր է խաղում տարածաշրջանի անվտանգության ամրապնդման և առևտրի ու ապրանքների տարանցման զարգացման գործում: