Իրանում Հայաստանի դեսպան Գրիգոր Հակոբյանը այցելեց «Իրանագիտության» հիմնադրամ
ԻԻՀ ՀՀ Դեսպան Գրիգոր Հակոբյանն այցելել է Թեհրանում գործող «Իրանագիտության» հիմնադրամ` հանդիպել հիմնադրամի ղեկավար, ԻԻՀ նախկին արտգործնախարար Ալի Աքբար Սալեհիի հետ։
Հանդիպման ընթացքում կողմերը քննարկել են Իրան-Հայաստան երկկողմ հարաբերությունների ներկա ընթացքն ու զարգացման դինամիկան՝ գոհունակությամբ արձանագրելով վերջին տարիներին տարբեր, այդ թվում՝ քաղաքական, տնտեսական, մշակութային և գիտակրթական ոլորտներում արձանագրված առաջընթացը։
Զրուցակիցներն անդրադարձել են Իրանում և Հայաստանում իրանագիտության ու հայագիտության զարգացման հնարավորություններին՝ կարևորելով այս ուղղությամբ փոխանակման ծրագրերի և համատեղ միջոցառումների նշանակությունը։
Հատուկ ուշադրություն է դարձվել նաև Հարավային Կովկասի անվտանգությանն ու տարածաշրջանային կայունությանը, քննարկվել են միջազգային վերջին զարգացումներին առնչվող հարցեր:
Իրանում ՀՀ դեսպան Գրիգոր Հակոբյանն այցելել է նաև Թեհրանում Իրանի ազգային թանգարան` հանդիպել է թանգարանի տնօրեն Ջեբրայիլ Նոքանդեի հետ:
Կողմերը կարևորել են Իրանի ազգային թանգարանի և Հայաստանի պատմության թանգարանի միջև համագործակցության ակտիվացումը, անդրադարձ է կատարվել համատեղ նոր ծրագրեր անցկացնելու հնարավորություններին:
