Արաղչի. Հարստացումը Իրանի օրինական իրավունքն է, և մենք դրանից չենք նահանջի
Նշելով, որ ուրանի հարստացումն Իրանի անկախության և ազգային արժանապատվության մի մասն է, ԻԻՀ ԱԳ նախարար Աբբաս Արաղչին հայտարարել է, որ ոչ ոք իրավունք չունի Իրանին թելադրել, թե ինչ կարողություններ պետք է ունենա։
Առաջին ազգային արտաքին քաղաքականության կոնգրեսում ունեցած ելույթում, հղում անելով Իրանի միջուկային քաղաքականության հիմքում «գերիշխանության անտեսման» սկզբունքին, Արաղչին նշել է, որ Թեհրանը պատրաստ է լուծել մտահոգությունները և վստահություն ձևավորել, բայց չի զիջի իր օրինական իրավունքները։ Նա նաև պարզաբանեց, որ Իսլամական Հանրապետությունը չի ձգտում միջուկային զենքի և շեշտը դնում է դիվանագիտական լուծումների վրա։
Mehr լրատվական գործակալության փոխանցմամբ՝ Արաղչին բանակցությունները համարել է վեճերի լուծման միակ միջոցը՝ հավելելով, որ դրանք արդյունք կունենան այն ժամանակ, երբ հարգվեն Իրանի ժողովրդի իրավունքները։
Արաղչիի խոսքով՝ Իրանը հրամաններ չի ստանում որևէ տերությունից, և երկրի արտաքին քաղաքականությունը հիմնված է արժանապատվության, անկախության և երկխոսության սկզբունքների վրա։ Խոսելով արտաքին ճնշումների մասին՝ արտաքին գործերի նախարարը ընդգծել է, որ Իրանը չի վախենում ռազմական ուժերի կուտակումներից, և որ պաշտպանական պատրաստվածությունը միայն պատերազմը կանխելու համար է։ Նա հավելել է, որ գիտելիքներն ու տեխնոլոգիաները չեն ոչնչացվի ճնշման կամ սպառնալիքների պատճառով, և դիվանագիտության ուղին կշարունակվի, եթե լինի փոխադարձ հարգանք։