Ղարիբաբադի․ Կասպից ծովի անվտանգությունը պետք է ապահովեն մերձափնյա պետությունները
Իրանի արտաքին գործերի նախարարի՝ իրավական և միջազգային հարցերով տեղակալն ընդգծել է, որ Կասպից ծովի անվտանգությունը, կայունությունը և ապագան պետք է որոշեն և ապահովեն մերձափնյա պետությունները՝ առանց տարածաշրջանից դուրս գտնվող ուժերի միջամտության։
Ինչպես հաղորդում է Pars Today-ը՝ վկայակոչելով Mehr լրատվական գործակալությունը, Կասպից ծովի ազգային օրվան նվիրված միջոցառման ժամանակ Քազեմ Ղարիբաբադին հայտարարել է, որ Կասպից ծովի անվտանգությունը, նախևառաջ, տարածաշրջանային և ներքին պատասխանատվության խնդիր է, որը պետք է պահպանվի մերձափնյա հինգ պետությունների կողմից համաձայնեցված մեխանիզմների միջոցով։
Կարևորելով Կասպից ծովի պատմական և ռազմավարական նշանակությունը՝ նա հավելել է, որ ջրային այս ավազանը պարզապես աշխարհագրական տարածք չէ, այլ շրջակա ազգերի ինքնության, հարաբերությունների և տարածաշրջանային կապերի անբաժանելի մասը, ինչպես նաև զգալի տեղ է զբաղեցնում մերձափնյա պետությունների ռազմավարական հաշվարկներում։
Շեշտելով Կասպից ծովում ոչ մերձափնյա պետությունների ռազմական ներկայության արգելքը՝ Ղարիբաբադին հայտարարեց, որ ծովը չպետք է դառնա մրցակցության կամ տարածաշրջանից դուրս գտնվող ուժերի ներկայության ասպարեզ։
Իրանի ԱԳ նախարարի տեղակալը նշեց, որ թեև հինգ մերձափնյա պետությունները կարող են տարբերվող տեսակետներ և առաջնահերթություններ ունենալ որոշակի հարցերի շուրջ, Կասպից ծովը, այնուամենայնիվ, երկխոսության և համագործակցության զգալի ներուժ է պարունակում։
Նա ընդգծեց, որ մերձափնյա պետությունները պետք է ինքնուրույն որոշեն Կասպից ծովի անվտանգությունը, կայունությունն ու ապագան և, համագործակցությունն ամրապնդելու միջոցով, ծովը վերածեն տարածաշրջանի երկրների կողմից հաստատված տարածաշրջանային անվտանգության համակարգի օրինակի։