Ղարիբաբադի․ Հորմուզի նեղուցը փակվում և բացվում է միայն Իրանի հրամանով
Իրանի արտաքին գործերի նախարարի իրավական և միջազգային հարցերի տեղակալ Քազեմ Ղարիբաբադին, արձագանքելով ԱՄՆ նախագահ Դոնալդ Թրամփի՝ Հորմուզի նեղուցի վերաբերյալ հայտարարություններին, ընդգծել է, որ նեղուցը փակվում և բացվում է միայն Իրանի հրամանով։
Ղարիբաբադին X-ում գրել է․ «Թրամփը հայտարարել է, որ Իրանի պարտությունից հետո շուտով Հորմուզի նեղուցը կհայտարարի ԱՄՆ տարածք»։
Նա նշել է․ «Հորմուզի նեղուցը հնարավոր չէ գրավել ոչ թվիթով, ոչ ավիակրով, ոչ հրաման արձակելով և ոչ էլ նախընտրական ելույթով։ Իրանը չի վախենում սպառնալիքներից և չի ահաբեկվում ուժի ցուցադրությամբ։ Հորմուզի նեղուցը եղել է, կա և կլինի իրանական։ Այս նեղուցը փակվելու և բացվելու է միայն Իրանի հրամանով»։
Նա ընդգծել է․ «Քանի դեռ ԱՄՆ-ը չի ընդունել իր ռազմավարական պարտությունը և չի հրաժարվել «պատրանքներից», Իրանը կշարունակի շրջափակումը»։
Ղարիբաբադին ընդգծել է. «Մի անգամ ընդմիշտ ընդունեք իրականությունը. մինչ այժմ դուք կրել եք ռազմավարական և ծանր պարտություններ։ Հորմուզի նեղուցը եղել է, կա և կմնա իրանական։ Այս նեղուցը փակվելու և բացվելու է միայն Իրանի հրամանով, և քանի դեռ չեք ընդունել պարտության իրականությունը և չեք հրաժարվել պատրանքներից, Իրանը կշարունակի շրջափակումը»։