Բաղայի․ Հորմուզի նեղուցում անկայունության պատճառն ԱՄՆ-ն է, ոչ թե Իրանը
Իրանի ԱԳՆ խոսնակ Էսմայիլ Բաղային, հերքելով Հորմուզի նեղուցում անկայունության վերաբերյալ ԱՄՆ-ի պնդումները, հայտարարել է, որ Վաշինգտոնն է պատերազմ սկսել, որի մեկնարկից առաջ նեղուցը բաց էր, իսկ այժմ փորձում է Իրանին ներկայացնել որպես նավագնացության խափանման պատճառ։
Հղում անելով IRIB-ին՝ Pars Today-ը հաղորդում է, որ Էսմայիլ Բաղային X-ում գրել է․ «ԱՄՆ-ն ու Իսրայելի ռեժիմը Իրանի վրա հարձակմամբ տարածաշրջանին պարտադրել են անօրինական և դաժան պատերազմ ու խաթարել նավագնացության բնականոն ընթացքը։ Դրա հետևանքով նավթատարները կանգ են առել, առևտուրը տուժել է, իսկ էներգակիրների գներն աճել են»։
Բաղային հավելել է, որ Վաշինգտոնը փորձում է իր իսկ սկսած պատերազմի ծախսերի բեռը դնել ամբողջ աշխարհի վրա և Իրանին ներկայացնել որպես դրա հետևանքների պատասխանատու։
Նա ընդգծել է, որ պատերազմը սկսել է ԱՄՆ-ն, սակայն ակնկալում է, որ դրա գինը կվճարի աշխարհը՝ միաժամանակ Իրանին ներկայացնելով որպես այն քաոսի պատճառ, որը, նրա խոսքով, ինքն է ստեղծել։
Բաղային այս տեսակետը որակել է որպես «անիմաստ և անհիմն իրականության խեղաթյուրում»։