Իրանի խորհրդարան․ պատժամիջոցներ կիրառող երկրներն իրավունք չունեն անցնելու Հորմուզի նեղուցով
Իրանի խորհրդարանի Ազգային անվտանգության և արտաքին քաղաքականության հանձնաժողովը հաստատել է հոդված, որի համաձայն՝ Իրանի նկատմամբ պատժամիջոցներ կամ թշնամական գործողություններ իրականացնող երկրներին և անձանց կարգելվի անցնել Հորմուզի նեղուցով։
Հղում անելով IRNA-ին՝ Pars Today-ը հաղորդում է, որ Հասան Ղաշղավին հայտնել է, որ հանձնաժողովի նիստում հաստատվել է «Հորմուզի նեղուցի անվտանգության և առաջընթացի ապահովման ռազմավարական գործողությունների ծրագիր» օրինագծի 9-րդ հոդվածը։
Նրա խոսքով՝ այդ հոդվածի համաձայն՝ պատժամիջոցների ենթակա երկրների և անձանց հետ փոխկապակցված նավերի և բեռների անցումը Հորմուզի նեղուցով կարգելվի։
Ղաշղավին հայտնել է նաև, որ Իրանի Զինված ուժերի գլխավոր շտաբը սահմանվել է որպես թշնամական գործողությունների որոշման, իսկ Ազգային անվտանգության բարձրագույն խորհուրդը՝ Իրանի նկատմամբ պատժամիջոցներ կիրառող կամ իրանական ակտիվները արգելափակող երկրների և հաստատությունների բացահայտման իրավասու մարմին։