Հորմուզի նեղուցը փակ է, անցումը պետք է համաձայնեցվի
Իրանի բանակի համակարգող տեղակալը հայտարարել է, որ Հորմուզի նեղուցը փակ է և նեղուցով ցանկացած անցում պետք է իրականացվի համաձայնեցված կարգով, հակառակ դեպքում դրա հետևանքները կերևան լրատվական հաղորդագրություններում։
Mehr գործակալության փոխանցմամբ՝ Իրանի բանակի շտաբի պետ և համակարգող տեղակալ, փոխծովակալ Հաբիբոլլահ Սայարին հինգշաբթի օրը, բանակի բուժքույրերին մեծարելու արարողության շրջանակում լրագրողների հետ զրույցում անդրադարձել է Հորմուզի նեղուցի իրավիճակին։
«Հորմուզի նեղուցը փակ է։ Եթե այն փակ չլիներ, և նավթն անցներ այդտեղով, ԱՄՆ-ում բենզինի գինը չէր բարձրանա։ Այս հարցը լիովին պարզ է», — նշել է նա։
Անդրադառնալով տարածաշրջանում զինված ուժերի ներկայությանը՝ Սայարին հավելել է, որ Հորմուզի նեղուցից արևմուտք ամուր դիրքեր են զբաղեցնում Իսլամական հեղափոխության պահապանների կորպուսի ռազմածովային ուժերը, իսկ նեղուցից արևելք՝ մինչև Օմանի ծովի հյուսիսային հատվածը, Իրանի Իսլամական Հանրապետության բանակը ներկայանում է իր ողջ հզորությամբ և իրականացնում տարածաշրջանի լիակատար վերահսկողություն ու մշտադիտարկում։
Փոխծովակալ Սայարին ընդգծել է, որ նեղուցով ցանկացած անցում պետք է համաձայնեցվի, հակառակ դեպքում դրա հետևանքները կարելի է տեսնել լրատվական հաղորդագրություններում։
Իրանի բանակի համակարգող տեղակալը հավելել է, որ այս իրավիճակն ինքնին վկայում է Հորմուզի նեղուցի փակ լինելու մասին։ Նրա խոսքով՝ եթե նեղուցը բաց լիներ, նավթը կտեղափոխվեր դրա միջով, և բենզինի գները չէին բարձրանա։
Սայարին հավելել է, որ քանի դեռ այդ երկրները փորձում են ապահովել իրենց բենզինի և դիզելային վառելիքի մատակարարումները, դա նշանակում է, որ Հորմուզի նեղուցը փակ է, և դրա ակնհայտ ապացույցը հենց այդ իրավիճակն է։
