Փեզեշքիան․ Իրանի եւ Ռուսաստանի ռազմավարական համագործակցությունը կընդլայնվի
Pars Today – Իրանի նախագահը, ընդգծելով Թեհրանի եւ Մոսկվայի միջեւ ձեռք բերված պայմանավորվածությունների եւ փոխըմբռնումների իրագործումն արագացնելու անհրաժեշտությունը, հայտարարել է, որ Իրանը եւ Ռուսաստանը, հենվելով իրենց ընդհանուր հնարավորությունների վրա եւ օգտվելով տարածաշրջանային ու միջազգային մեխանիզմներից, կարող են արդյունավետ դեր խաղալ խաղաղության, կայուն անվտանգության եւ բազմակողմ աշխարհակարգի ամրապնդման գործում։
Pars Today-ի հաղորդմամբ՝ IRIB-ին հղումով, Իրանի նախագահ Մասուդ Փեզեշքիանը երկուշաբթի օրը Ռուսաստանի արտաքին գործերի նախարար Սերգեյ Լավրովի հետ հանդիպման ժամանակ գոհունակություն է հայտնել երկու երկրների հարաբերությունների եւ փոխգործակցության զարգացման ընթացքի առնչությամբ։ Նա ընդգծել է երկկողմ համագործակցության մակարդակը բարձրացնելու, քաղաքական ու դիվանագիտական համակարգումը խորացնելու եւ Թեհրանի ու Մոսկվայի ռազմավարական հարաբերությունների շրջանակում ձեռք բերված պայմանավորվածությունների կատարման հետեւողական ընթացքն ապահովելու անհրաժեշտությունը։
Անդրադառնալով Ռուսաստանի նախագահ Վլադիմիր Պուտինի հետ իր վերջին հանդիպումներին եւ հեռախոսազրույցներին՝ Փեզեշքիանն ասել է, որ Ռուսաստանի նախագահի հետ շարունակական խորհրդակցությունների ընթացքում լրջորեն քննարկվում եւ առաջ են մղվում երկկողմ պայմանավորվածություններին, դրանց իրականացման ծրագրերին եւ համատեղ համագործակցության ընդլայնմանն առնչվող հարցերը։ Նա հույս է հայտնել, որ Մոսկվա կատարելիք առաջիկա այցի ընթացքում հնարավոր կլինի ստեղծել անհրաժեշտ պայմաններ՝ պայմանավորվածությունները գործնականում կյանքի կոչելու եւ համաձայնեցված ոլորտներում շոշափելի արդյունքների հասնելու համար։
Հանդիպման մեկ այլ հատվածում, անդրադառնալով տարածաշրջանային զարգացումներին եւ սիոնիստական ռեժիմի ու ԱՄՆ-ի՝ Իրանի դեմ իրականացրած վերջին ագրեսիային, Փեզեշքիանն ասել է․ «Հեղափոխության առաջնորդի, հրամանատարների, գիտնականների եւ դպրոցականների սպանությունը, ինչպես նաեւ մեր երկրի ենթակառուցվածքների թիրախավորումը չեն համապատասխանում որեւէ իրավական կամ միջազգային չափանիշի։ Այս գործողություններն իրականացվեցին այն ժամանակ, երբ Իրանի Իսլամական Հանրապետությունը երկխոսության եւ դիվանագիտական փոխգործակցության ուղու վրա էր»։
Փեզեշքիանն ընդգծել է, որ Իրանի Իսլամական Հանրապետությունը չի ընդունում, որ որեւէ երկիր, հենվելով իր ուժի եւ ճնշման գործիքների վրա, իր կամքն ու պահանջները պարտադրի մյուս ժողովուրդներին։ «Մենք ցանկանում ենք փոխադարձ հարգանքի, ժողովուրդների իրավունքների պահպանման, կառուցողական համագործակցության եւ բազմակողմանիության վրա հիմնված աշխարհակարգ։ Համոզված ենք, որ այս հարցերում Ռուսաստանը եւս Իրանի հետ ունի ընդհանուր տեսակետներ եւ համահունչ մոտեցում»,– ասել է Փեզեշքիանը։
Ռուսաստանի արտաքին գործերի նախարար Սերգեյ Լավրովն իր հերթին ընդգծել է Մոսկվայի պատրաստակամությունը՝ ամրապնդելու համագործակցությունը Թեհրանի հետ։ Նա երկու երկրների համագործակցության կարեւոր ուղղությունների շարքում նշել է նավթի եւ գազի ոլորտները, կապն ու լրատվամիջոցները, մշակութային համագործակցությունը, տրանսպորտը, էներգետիկան, ինչպես նաեւ գիտական եւ համալսարանական կապերի ընդլայնումը։
Անդրադառնալով միջազգային հարցերի շուրջ Իրանի եւ Ռուսաստանի տեսակետների ընդհանրությանը՝ Ռուսաստանի արտաքին գործերի նախարարը կարեւորել է դիվանագիտական խորհրդակցությունների շարունակականությունը եւ առկա հնարավորությունների օգտագործումը՝ խաղաղության ու անվտանգության ամրապնդմանն աջակցելու համար։
Լավրովը նաեւ անդրադարձել է Կասպից ծովի հարցում ձեռք բերված պայմանավորվածություններին՝ ընդգծելով երկու երկրների շահերի պաշտպանության նպատակով համատեղ համագործակցությունն ամրապնդելու եւ տարածաշրջանային համակարգումը խորացնելու անհրաժեշտությունը։ Նա Իրանի եւ Ռուսաստանի համագործակցության զարգացումը համարել է ընդհանուր նպատակների առաջմղման, ինչպես նաեւ տարածաշրջանում կայունության եւ համագործակցության ամրապնդման կարեւոր գործոն։