Զարիֆ. Իրանն ու Ճապոնիան ձգտում են երկկողմ հարաբերությունների ընդլայնմանը
Իրանի ԱԳ նախարարն ընդգծել է Իրանի ու Ճապոնիայի հարաբերությունների մակարդակի բարձրացման և երկկողմ կապերի ընդլայնման անհրաժեշտությունը:
ԻՌՆԱ-ի հաղորդման համաձայն, Մոհամմեդ Ջավադ Զարիֆը երեքշաբթի գիշեր Տոկիոյի օդանավակայանում լրագրողների հետ զրույցի ժամանակ ընդգծել է. «Ճապոնիա կատարած ուղևորության ընթացքում, ինչպես և Հնդկաստանում ու Չինաստանում, քննարկումների մեծ մասը նվիրված կլինեն երկկողմ տնտեսական ու քաղաքական հարաբերությունների ընդլայնմանը»:
«Իրանից Ճապոնիա է մեկնել քաղաքա-տնտեսական մեծ պատվիրակություն, որպեսզի քննարկի արտահանումների ու ներկրումների, ինչպես նաև համատեղ համագործակցությունների հետ կապված հարցեր»,-հավելել է Զարիֆն անդրադառնալով չորեքշաբթի օրը գումարվելիք Իրանի ու Ճապոնիայի տնտեսական նիստին:
ԻԻՀ ԱԳ նախարարն ընդգծել է, որ Ճապոնիա երկօրյա ուղևորության ընթացքում այդ երկրի բարձրաստիճան պաշտոնյաների հետ քննարկելու է քաղաքական ընթացիկ, ինչպես նաև տարածաշրջանային ու միջազգային զարգացումների հետ կապված հարցեր:
ԻԻՀ ԱԳ նախարարը Տոկիոյում հանդիպում ու զրույց կունենա Ճապոնիայի վարչապետ Շինզո Աբեի, ինչպես նաև ԱԳ, արդյունաբերության ու էկոնոմիկայի նախարարների և այդ երկրի արտաքին առևտրի կազմակերպության պետի հետ:
