Ղասեմի.«Ահաբեկչական հարձակումների ավելացումն ահազանգ է միջազգային հանրության համար»
Դատապարտելով Լոնդոնում տեղի ունեցած ահաբեկչական հարձակումները, Իրանի ԱԳ նախարարության խոսնակն ասել է.«Աշխարհում ահաբեկչական շղթայական հարձակումների ուժգնացումը նախազգուշացնող նշան է միջազգային հանրության համար»:
Այսօր, դատապարտելով Լոնդոնում տեղի ունեցած հարձակումները և ցավակցություն հայտնելով այդ հարձակումների հետևանքով զոհվածների հարազատներին, Բահրամ Ղասեմին ասել է.«Ահաբեկչությունից աշխարհի ժողովրդին պաշտպանելու և նրանց անվտանգությունը ապահովելու համար որոշ պետություններ պետք է հանուն աշխարհի անվտանգության հրաժարվեն իրենց քաղաքական, տնտեսական և առերևույթ ռազմավարական կարճատև շահերից»:
Նա հավելել է.«Ահաբեկչությունն արմատախիլ անելու համար պետք է չորացնել ծայրահեղականության ֆինանսավորման ու գաղափարախոսության գլխավոր աղբյուրները»:
Կենսական անհրաժեշտություն համարելով ահաբեկչության ու ծայրահեղականության արմատախիլ անելը, Ղասեմին ընդգծել է.«Այդ չարաբաստիկ երևույթից աշխարհի փրկության միակ ելքը բոլոր երկրների անկեղծ ու պատասխանատու միավորումն է ընդդեմ բռնության ու ծայրահեղականության»:
