Իրանը ձգտում է ամրապնդել իր պաշտպանական ու զսպիչ ուժը
Իրանի պաշտպանության և զինված ուժերի աջակցման նախարարն ասել է.«Իրանը շարունակում է ջանքեր գործադրել իր պաշտպանական ու զսպիչ ուժն ամրապնդելու ուղղությամբ»:
Բրիգադային գեներալ Ամիր Հաթամին այսօր Թեհրանում Նիդերլանդների դեսպան Սուզաննա Թերստալի հետ հանդիպման ժամանակ նշել է. «Իրանն իր Սրբազան պաշտպանության ութամյա փորձով (Իրանի դեմ Իրաքի պարտադրյալ պատերազմ) հանգել է այն եզրակացությանը, որ առանց պաշտպանական ու զսպիչ ուժի չի կարող ապահովել իր ազգային անվտանգությունը»:
Իրանի պաշտպանության նախարարը տարածաշրջանի անկայուն վիճակի պատճառը վերտարածաշրջանային ուժերի միջամտության արդյունքն է համարել:
«Տարածաշրջանային ճգնաժամերն առաջացել են օտարերկրյա ուժերի միջամտության ու օկուպացիայի և երկակի վերաբերմունքի արդյունքում»․ հստակեցրել է Իրանի պաշտպանության նախարարը:
Անդրադառնալով Իրանի կողմից Եմենին հրթիռ տրամադրելու կապակուցությամբ ԱՄՆ-ի զավեշտալի հայտարարությանը, գեներալ Ամիր Հաթամին նշել է.«Ամերիկացիների ու նրանց դաշնակիցների հայտարարությունն իրականում նպատակ ունի միջազգային հանրության ուշադրությունը շեղել Եմենում իրականացվող ոճրագործություններից»:
Հանդիպման ժամանակ Թեհրանում Նիդերլանդների դեսպան Սուզաննա Թերստալը նշելով, որ իր երկիրը ցանկանում է ընդլայնել իր պաշտպանական հարաբերություններն Իրանի հետ, ասել է. «Նիդերլանդները ցանկանում է, որ ողջ աշխարհում խաղաղություն ու անվտանգություն լինի, ինչը մեծ նշանակություն ունի այս երկրի իշխանությունների համար»:
