Թուրքիան հարձակվել է Իրաքյան Քուրդիստանի վրա. Կա երկու զոհ
Լրատվական աղբյուրները հաղորդել են,որ Իրաքյան Քուրդիստանի հյուսիսային հատվածի վրա Թուրքիայի իրականացրած հարձակման հետևանքով զոհվել է երկու քաղաքացիական անձ:
Իրաքյան Քուրդիստանի Սոլեյմանիեում գտնվող Սանգսար շրջանի ղեկավար Նեհրո Աբդուլլահն ասել է.«Անցած 24 ժամերի ընթացքում Թուրքիայի ինքնաթիռները ռմբակոծել են Ղանդիլի բարձունքները և հարակից գյուղերը, որոնելով Քուրդիստանի աշխատավորական կուսակցության (PKK) անդամներին»:
Ըստ հաղորդման՝ Թուրքիայի պաշտպանության նախարարությունը նաև խոստովանել է, որ օդային հարվածների ընթացքում ոչնչացրել է «Քուրդիստանի աշխատավորական կուսակցության» ահաբեկիչներին պատկանող 40 թիրախ:
Թուրքիան վաղուց խախտում է Հյուսիսային Իրաքի տարածքային ամբողջականությունը` PKK-ին դիմակայելու պատրվակով` պնդելով, որ թիրախավորում է «Քուրդիստանի աշխատավորական կուսակցության» (PKK) ռազմաբազաները, մինչդեռ ընդամենը մեկ ամիս առաջ` Իրաքի հյուսիսային հատվածում թուրքական օդուժի հարվածների պատճառով Իրաքի այդ տարածքի 47 գյուղերի բնակիչները լքել են իրենց տները:
