Իսրայելի արվեստի շուրջ 1000 գործիչներ իշխանություններից պահանջել են դադարեցնել պատերազմը Գազայում

Իսրայելի արվեստի շուրջ 1000 գործիչ ստորագրել է խնդրագիր, որով երկրի կառավարությանը կոչ է արվում դադարեցնել պատերազմը Գազայում՝ պատանդների վերադարձի դիմաց, հայտնում է Times of Israel-ը։

Արվեստի գործիչներն իրենց անհամաձայնությունն են հայտնել «Գազայի հատվածում տեղի ունեցող սարսափելի իրադարձություններին, հատկապես երեխաների և անմեղ մարդկանց սպանություններին, սովին, բնակչության տեղահանմանը և Գազայի քաղաքների անիմաստ ավերմանը»։

Խնդրագիրը որոշում կայացնող անձանց, ինչպես նաև հրամաններ կատարողներին կոչ է անում դադարեցնել այն գործողությունները, որոնք հավասարազոր են «ռազմական հանցագործությունների», և չհրաժարվել մարդասիրական արժեքներից։

Ստորագրողների թվում են Իսրայելում հայտնի երգիչներ Գիդի Գովը և Ռիկի Գալը, բաս կիթառահար Ավիշայ Քոենը և դերասանուհի Կերեն Մորը։