Սիրիայի բանակցող պատվիրակությունը վաղը կմեկնի Ժնև
Սիրիայի ԱԳ նախարարությունը հայտարարել է.«Սիրիական բանակցող պատվիրակությունը չորեքշաբթի օրը կմեկնի Շվեյցարիայի Ժնև քաղաք, մասնակցելու սիրիական-սիրիական ձևաչափով բանակցությունների 8-րդ փուլին»:
Ինչպես հաղորդում է ՍԱՆԱ լրատվական գործակալությունը, այդ երկրի ԱԳ նախարարության մի պաշտոնական աղբյուր հայտարարել է. «Սիրիայի ու Ռուսաստանի միջև սեղմ բանակցություններից հետո, Դամասկոսը որոշեց մասնակցել սիրիական-սիրիական ձևաչափով բանակցություններին»:
Ըստ հաղորդման՝ սիրիական պատվիրակությունը նախագահում է ՄԱԿ-ում Սիրիայի մշտական ներկայացուցիչ Բաշար Ալ Ջաաֆարին:
Նախատեսված էր, որ նոյեմբերի 28-ին տեղի ունենա Սիրիայի հարցով բանակցությունների 8-րդ փուլը, բայց սիրիական բանակցող պատվիրակությունը հետաձգեց իր այցը Ժնև:
Դեկտեմբերի 2-ին Ռուսաստանի Սոչի քաղաքում տեղի կունենա սիրիական խմբերի ազգային երկխոսությունը:
Սիրիայի հարցով ՄԱԿ-ի գլխավոր քարտուղարի հատուկ ներկայացուցիչ Ստեֆան Դի Միստուրան ընդգծել է.«Ժնևյան բանակցությունները պետք է տեղի ունենան առանց որևէ նախապայմանի»:
