Սաուդյան Արաբիան ԱՄՆ-ից 15 մլրդ դոլարի THAAD համակարգեր է գնելու
Սաուդյան Արաբիան 15 մլրդ դոլար արժողությամբ ամերիկյան THAAD հակահրթիռային պաշտպանության համակարգեր գնելու վերաբերյալ համաձայնագիր է ստորագրել Միացյալ Նահանգների հետ:
«Ռոյետերս»-ի հաղորդման համաձայն, ԱՄՆ պետքարտուղարության ներկայացուցիչը հայտարարել է, որ նոյեմբերի 26-ին Սաուդյան Արաբիայի և ԱՄՆ-ի պաշտոնյաները ստորագրել են միջկառավարական համաձայնագիր, որը սահմանում է վաճառքի պայմանագրով THAAD հակահրթիռային պաշտպանության համակարգերի մատակարարման պայմանները:
Դիվանագետը հիշեցրել է, որ 2017թ.-ի հոկտեմբերին ԱՄՆ պետքարտուղարությունը Կոնգրեսին տեղեկացրել է Սաուդյան Արաբիային 15 մլրդ դոլարի 44 հատ THAAD-ի արձակման կայանքների, հրթիռների և կից սարքավորումների հնարավոր գործարքի մասին:
Սաուդցի լրագրող Ջամալ Խաշողջիի սպանությունից հետո վերջին շաբաթների ընթացքում Միացյալ Նահանգների նախագահ Դոնալդ Թրամփի կառավարությունը և սպառազինությունների ընկերությունները փորձում են պահպանել Սաուդյան Արաբիայի հետ ստորագրված 120 միլիարդ դոլար արժողությամբ զենքի գործարքը:
ԱՄՆ-ն, շարունակելով իր շահամոլական քաղաքականությունը, աջակցել է Սաուդյան Արաբիայում կատարված հանցագործություններին, ներառյալ Եմենի դեմ պատերազմը եւ դիրքորոշում չի հայտարարել Սաուդյան ռեժիմի քննադատ լրագրող Ջամալ Խաշողջիի սպանության վերաբերյալ:
