Օլիմպիական խաղերի կրակը վառելու և փոխանցելու արարողությունը կանցկացվի առանց հանդիսականի

Տոկիոյի 32-րդ ամառային Օլիմպիական խաղերի կրակը վառելու և փոխանցելու արարողությունը կկայանա առանց հանդիսականի:

Այս մասին հայտնում է Հունաստանի ազգային օլիմպիական կոմիտեն: Որոշման պատճառը աշխարհում տարածում ստացող կորոնավիրուսն է: Արարողությունը նախատեսված է մարտի 12-ին, որին, նախնական տեղեկություններով, կմասնակցի ընդամենը մոտ 100 երկրպագու:

32-րդ ամառային Օլիմպիական խաղերը կհյուրընկալի Տոկիոն: Դրանք կմեկնարկեն հուլիսի 24-ին և կեզրափակվեն օգոստոսի 9-ին: Աշխարհի 206 երկրի մոտ 11 հազար մարզիկներ կմրցեն 33 մարզաձևերում: Տոկիոն երկրորդ անգամ է հյուրընկալելու Օլիմպիական խաղերը: Առաջին անգամ հյուրընկալել է հեռավոր 1964 թվականին:

Տոկիոյի 32-րդ ամառային Օլիմպիական խաղերի կազմկոմիտեն արդեն իսկ հասցրել է ներկայացնել խաղերի ջահը: Օլիմպիական խաղերի ջահը կշռում է 1,2 կգ և ունի ոսկե սակուրայի տեսք: Ջահը վերևից հիշեցնում է սակուրայի ծաղիկ: 32-րդ ամառային Օլիմպիական խաղերի կրակը կվառվի 2020 թվականի մարտի 12-ին, ըստ ավանդույթի, Հունաստանում: Այն Ճապոնիա կտեղափոխվի 2020 թվականի մարտի 20-ին: Իսկ ջահի փոխանցումավազքը կսկսվի Ֆուկուսիմայում:

1in.am