Եպիսկոպոսը թույլ չի տվել եկեղեցական հողերում միգրանտների դեմ արգելապատնեշ կառուցել
Ավստրիական Այզենդտադի կաթոլիկ եպիսկոպոս Էգիդիոս Ժիվկովիցը հրաժարվել է ստորագրել երկու եկեղեցիների տարածքով անցնող հատվածում արգելապատնեշի կառուցման թույլտվությունը, որն իշխանությունները ցանկանում են կառուցել՝ երկիր միգրանտների հոսքը կանխելու համար: Այս մասին գրում է ՌԻԱ Նովոստին՝ վկայակոչելով Christian Today-ը:
«Անցյալ տարի մենք այս շենքերում ավելի քան հազար կանանց, երեխաների, ծերերի եւ հիվանդների տեղավորեցինք: Եվ հիմա պետք է եկեղեցական հողերում արգելապատնեշնե՞ր կառուցենք»,- հայտարարել է եպիսկոպոսը:
Նրա խոսքով, այդ մոտեցումը «հակասում է Ավետարանի եւ Ֆրանցիսկոս պապի հայտարարությունների ոգուն»:
Ավստրիան ծրագրում է մի քանի պարիսպ կառուցել՝ Հունգարիայի հետ սահմանագոտում միգրանտների հոսքը վերահսկելու համար: Անցյալ տարի պետության սահմանը շուրջ 900 հազար մարդ է հատել, որոնք հետագայում ուղղվել են դեպի Գերմանիա եւ սկանդինավյան երկրներ:
