Թուրքիայում թալանվում են հայկական հուշարձանները
Թուրքիայի մայրաքաղաք Անկարայի Սինջան թաղամասի հին հայկական գերեզմանատունը ավերվել է գանձագողերի կողմից և սարսափելի տեսք է ստացել:
Ինչպես հաղորդում է Հայաստանի հանրային ռադիոյի կայքը, հայկական գերեզմանատունը, որն ավելի քան 600 տարեկան է, հայտնվել է գանձագողերի թիրախում:
Թուրքիայում բնակվող պատմաբան Էրդինչ Աքյուլն այս կապակցությամբ ասել է. «Թուրքիայի կառավարությունը կարևորություն չի տալիս այս տարածքի պաշտպանությանը»:
«Այս իրավիճակը ինձ շատ է անհանգստացնում: Այն չպետք է քանդվի այս կերպ: Սա բացօթյա արժեքավոր թանգարան է»,- ասել է հայ պատմաբանը:
Հաղորդման համաձայն, Աքյուլը թուրքական իշխանություններին կոչ է արել անհապաղ լուրջ պաշտպանության տակ ներառել գերեզմանատունը:
Ավելի վաղ Լեռնային Ղարաբաղի Շուշի քաղաքի քաղաքապետ Արծվիկ Սարգսյանը քննադատել էր Ադրբեջանում կառավարական ուժերի կողմից հայկական կրոնական և մշակութային հուշարձանների ոչնչացումը:
