Մերկելը Ճապոնիային առաջարկել է անդամակցել ՆԱՏՕ-ին
Գերմանիայի կանցլեր Անգելա Մերկելը 2015-ի մարտին Տոկիո այցի ընթացքում վարչապետ Սինձո Աբեին առաջարկել էր, որ Ճապոնիան անդամակցի ՆԱՏՕ-ին: Այդ մասին հայտնում է The Japan News-ը` ճապոնական խոշոր Yomiuri պարբերականի անգլալեզու թողարկումը:
«Սինձո, ինչո՞ւ դուք (Ճապոնիան) չմիանաք ՆԱՏՕ-ին: Ես կարող եմ համոզել բրիտանական վարչապետ (Դեւիդ) Քեմերոնին եւ ֆրանսիական նախագահ (Ֆրանսուա) Օլանդին», — ասել է նա, պնդում է պարբերականը:
Նշվում է, որ Մերկելի առաջարկը ծայրաստիճան քիչ հավանական է, բայց Աբեն, անքաղաքավարի չլինելու համար որոշակի հետաքրքրություն է ցուցաբերել, նշել է, որ «ապագայում գուցե» պատասխանի:
Ճապոնիայի վարչապետը հավելել է, որ «եթե մենք այժմ միանանք, Ռուսաստանի հետ մեր բանակցությունները կդադարեն»:
Պարբերականն ընդգծում է, որ Ռուսաստանն արդեն երկար ժամանակ բացասաբար է վերաբերվում Եվրոպայում ՆԱՏՕ-ի զինվորականների թվի ավելացմանը: Եթե Աբեն հրապարակայնորեն հայտներ Ճապոնիայի` դաշինքին անդամակցելու ցանկության մասին, Ռուսաստանի հետ տարածքների հարցի քննարկումը փակուղի կմտներ:
Ճապոնիան Հյուսիսատլանտյան դաշինքի անդամ չէ, բայց Աֆղանստանի, Ավստրալիայի եւ այլ երկրների հետ մտնում է ՆԱՏՕ-ի հետ «Գլոբալ գործընկերության» ծրագրի մեջ:
Միաժամանակ մայիսի 6-ին նախատեսված է Աբեի հանդիպումը Ռուսաստանի նախագահ Վլադիմիր Պուտինի հետ Սոչիում, որտեղ նրանք կքննարկեն Ռուսաստանի եւ Ճապոնիայի համագործակցության վիճակը եւ հեռանկարները առեւտրա-տնտեսական եւ մարդասիրական ոլորտներում, հայտնում է Gazeta-ն:
