Լավրովն ու Չավուշօղլուն պայմանավորվել են կազմակերպել «3+3» ձևաչափով հաջորդ հանդիպումը
Թուրքական կողմի նախաձեռնությամբ հեռախոսազրույց է կայացել ՌԴ ԱԳ նախարար Սերգեյ Լավրովի և Թուրքիայի ԱԳ նախարար Մևլութ Չավուշօղլուի միջև, տեղեկացնում է ՌԴ ԱԳՆ-ն։
Կողմերը գոհունակություն են հայտնել 2021 թվականին երկրների միջև բարձր և բարձրագույն մակարդակով քաղաքական երկխոսության ծավալման առնչությամբ, պատրաստակամություն է հնչել 2022 թվականին ևս շարունակել ՌԴ և Թուրքիայի ղեկավարների միջև սերտ շփումները։
Ի թիվս այլ հարցերի, քննարկվել է նաև «3+3» ձևաչափի արդյունավետությունը։
«ՌԴ և Թուրքիայի ԱԳ նախարարները դրական են գնահատել Անդրկովկասում իրավիճակի կարգավորման և համագործակցության զարգացման նպատակով 2021 թվականի դեկտեմբերի 10-ին Մոսկվայում կայացած «3+3» ձևաչափով առաջին հանդիպումը, պայմանավորվել են մոտ ժամանակներս կազմակերպել այս ձևաչափով հաջորդ հանդիպումը»,- նշված է ՌԴ ԱԳՆ հաղորդագրությունում։
Ռուսաստանի արտաքին քաղաքական գերատեսչությունից հայտնում են նաև, որ ՌԴ ԱԳՆ Սերգեյ Լավրովն աջակցություն է հայտնել Հայաստանի և Թուրքիայի միջև հարաբերությունների կարգավորմանն ուղղված ջանքերին։
aysor.am/am/news
