Անվտանգության խորհուրդն իրաքյան կողմերին զսպվածության կոչ է արել

Ուրբաթ օրը ՄԱԿ-ի Անվտանգության խորհուրդը իրաքյան բոլոր կողմերին զսպվածություն ցուցաբերելու և երկխոսություն սկսելու կոչ է արել:

Fars լրատվական գործակալության փոխանցմամբ, ՄԱԿ-ի Անվտանգության խորհրդի անդամները կոչ են արել Իրաքի բոլոր կողմերին խաղաղ ճանապարհով լուծել քաղաքական տարաձայնությունները, հարգել օրենքի գերակայությունը, խաղաղ հավաքներ անցկացնելու իրավունքը և խուսափել բռնությունից։

Այս հայտարարության մեջ Անվտանգության խորհրդի անդամները դատապարտել են օգոստոսի 29-ին և 30-ին Իրաքում տեղի ունեցած բռնի միջադեպերը և մտահոգություն հայտնել մի շարք քաղաքացիների զոհվելու և վիրավորվելու մասին տարածված հաղորդագրությունների առնչությամբ։

2021 թվականի հոկտեմբերին ընտրությունների արդյունքների հրապարակումից հետո Իրաքի քաղաքական կուսակցություններին չի հաջողվել երկրում նոր կառավարություն ձեւավորել ։