Էրդողանն առաջարկել է Պուտինի և Ասադի հետ եռակողմ հանդիպում անցկացնել
Անդրադառնալով իր ռուս և սիրիացի գործընկերների հետ եռակողմ հանդիպում ունենալու իր պատրաստակամությանը, Թուրքիայի նախագահը նշել է, որ ցանկանում է Դամասկոսի և Մոսկվայի հետ համատեղ մեխանիզմ ստեղծել՝ տարածաշրջանում ահաբեկչության դեմ պայքարելու համար։
«Ֆարս» գործակալության հաղորդման համաձայն, Թուրքիայի նախագահ Ռեջեփ Թայիփ Էրդողանը Թուրքմենստան կատարած իր այցից վերադառնալիս ասել է.«Անկարայի, Մոսկվայի և Դամասկոսի եռակողմ հանդիպման մասին առաջարկի նպատակն է՝ արագացնել դիվանագիտական ուղին՝ ահաբեկչության դեմ պայքարում արդյունավետ մեխանիզմներ ստեղծելու և Սիրիայում քաղաքական գործընթացն առաջ մղելու համար»:
Անդրադառնալով իր ռուս և սիրիացի գործընկերների հետ եռակողմ հանդիպման առաջարկին՝ Թուրքիայի նախագահը հայտարարել է, որ ՌԴ նախագահ Վլադիմիր Պուտինը ողջունել է այս առաջարկը։
Ավելի վաղ Թուրքիայի նախագահն առաջարկել էր հանդիպել Սիրիայի նախագահ Բաշար Ասադի հետ, ինչը մերժվել էր Սիրիայի իշխանությունների կողմից։
Դամասկոսը կարծում է, որ նման հանդիպումները շոշափելի արդյունքներ չեն ունենա, և սիրիացիները պահանջում են թուրքական ուժերի ամբողջական հեռացումն իրենց երկրից։
