ՌԴ օդատիեզերական ուժերի շարքերը համալրվել են նոր Սու-35Ս կործանիչներով
Այս տարի Սու-35Ս կործանիչների մի քանի խմբաքանակ արդեն մատակարարվել է, արտադրական փուլում են հաջորդ մատակարարումների համար նախատեսված նոր ինքնաթիռները։
Միացյալ ավիաշինարարական կորպորացիան (ՄԱԿ–ը, մտնում է «Ռոստեխի» մեջ) Ռուսաստանի օդատիեզերական ուժերին է փոխանցել նոր Սու-35Ս բազմաֆունկցիոնալ կործանիչների ևս մեկ խմբաքանակ։ Այս մասին հայտնում է «Ռոստեխը» Telegram–ի իր ալիքում։
« 4++ սերնդի ինքնաթիռներն անցել են գործարանային փորձարկումների ամբողջական ցիկլը, ընդունվել են տեխնիկական անձնակազմի կողմից և ՌԴ ՊՆ օդաչուների կողմից փորձարկվել են տարբեր աշխատանքային ռեժիմներով», – ասվում է հաղորդագրության մեջ։
«Սու-35Ս-ը աշխարհի ամենաարդյունավետ մարտական ինքնաթիռներից մեկն է, այն զինված է մեծ հեռահարության «օդ-օդ» և «օդ-մակերևույթ» դասի կառավարվող հրթիռներով։ Ինչպես նաև ունի ռադիոէլեկտրոնային հակազդեցության և պաշտպանության համակարգ և այլ առաջադեմ էլեկտրոնիկա, որը կործանիչը դարձնում է իրական սպառնալիք հակառակորդի համար», – ասել է «Ռոստեխ» ընկերության գործադիր տնօրեն Օլեգ Եվտուշենկոն։
Սու-35Ս-ը անցումային օղակ է հինգերորդ սերնդի ավիացիոն համակարգերին։ Կառավարման թվային համակարգով և քարշուժի վեկտորով կառավարվող նոր շարժիչների վրա հիմնված ուժային կայանը թույլ է տալիս զգալիորեն բարելավել ինքնաթիռի թռիչքատեխնիկական և մանևրելու բնութագրերը։
