Փեզեշքյան. Թշնամու նպատակն իսլամական երկրների առաջընթացի ճանապարհին խոչընդոտներ ստեղծելն է

Թուրքիայի արտգործնախարարի հետ հանդիպման ժամանակ Իրանի նախագահն ասել է. «Մինչ մուսուլման ազգերի ընդհանուր թշնամիները ձգտում են մեծացնել ճնշումը, իսլամական երկրները պետք է հեշտացնեն միմյանց համար պայմանները և խուսափեն իրավիճակի բարդացումից»։

Կիրակի օրը կայացած հանդիպմանն անդրադառնալով երկու երկրների պատմական, մշակութային և եղբայրական հարաբերություններին, Փեզեշքյանը նշել է, որ այդ հարաբերություններն ունեն խորը արմատներ, անկեղծ են և ունեն  զարգացման մեծ ներուժ։
Նա նշել է․ «Եթե իսլամական երկրները դրսևորեն միասնական կամք և գնան միասնության, մերձեցման և փորձի փոխանակման ճանապարհով, ոչ մի ուժ չի կարողանա խնդիրներ ստեղծել մուսուլման ազգերի համար»։
 Pars Today-ի փոխանցմամբ՝ ընդգծելով իսլամական երկրների միջև հարաբերությունների և ռազմավարական մերձեցման անհրաժեշտությունը, Իրանի նախագահը նշել է, որ տարածաշրջանի որոշ ճգնաժամեր դավադրությունների և միջամտությունների արդյունք են, որոնց հետևանքով առաջանում են տարաձայնություններ։ 
Նրա խոսքով․ «Այս հոսանքների նպատակն է տարածաշրջանին պարտադրել իրենց սխալ   քաղաքականությունը և խոչընդոտներ ստեղծել իսլամական երկրների զարգացման և առաջընթացի ճանապարհին»։

Սիոնիստական լրատվամիջոցներ. Երկու տարվա պատերազմից հետո Իսրայելի բանակը հյուծված է
 «Մաարիվ» թերթը գրել է, որ յոթ ճակատներում երկու տարի և երկու ամիս տևած լարված մարտերից հետո իսրայելական բանակը հյուծված է, սպաները՝ հոգնած, իսկ զինվորները երազում են տուն վերադառնալու մասին: Թերթը հավելել է, որ իսրայելական բանակն ունի  գրեթե 12,000 զինվորի պակաս։

Մադուրո. Մենք ԱՄՆ-ից կպաշտպանենք Վենեսուելայի էներգետիկ ռեսուրսները 
Նավթ արտահանող երկրներին ուղղված ուղերձում, Վենեսուելայի նախագահ Նիկոլաս Մադուրոն դատապարտել է ԱՄՆ-ի գործողությունները Կարակասի դեմ և ասել, որ իր երկիրը կպաշտպանի իր էներգետիկ ռեսուրսները:
 Ուղերձում Մադուրոն նշել է, որ Կարիբյան ավազանում ԱՄՆ-ի գործողությունների նպատակն է «տիրել Վենեսուելայի հսկայական նավթային պաշարներին՝ մեր տարածքի, ժողովրդի և հաստատությունների դեմ մահացու ռազմական գործողությունների միջոցով»։

Ալժիրը նախաձեռնություն է սկսում Աֆրիկայում գաղութատիրությունը քրեականացնելու համար 
Աֆրիկացի բարձրաստիճան պաշտոնյաների մասնակցությամբ Ալժիրը նոր նախաձեռնություն է սկսել՝ ուղղված  մայրցամաքում գաղութատիրությունը քրեականացնելուն։ Նոյեմբերի 30-ին և դեկտեմբերի 1-ին Ալժիրը նախատեսում է անցկացնել միջազգային համաժողով՝ «Գաղութատիրության հանցագործությունների հետաքննությունը Աֆրիկայում» թեմայով։ Հանդիպմանը կմասնակցեն աֆրիկյան երկրների արտաքին գործերի նախարարներ։ Այս կապակցությամբ Ալժիրի արտաքին գործերի նախարար Ահմեդ Աթաֆը շեշտել է, որ «Աֆրիկայի պատմական հիշողությունը չի մոռանա գաղութատիրական դարաշրջանի հանցագործությունները»։

Նեթանյահուին ներում շնորհելու հակառակորդները ցույց են անցկացրել Թել Ավիվում 
Իսրայելի վարչապետ Բենիամին Նեթանյահուին ներում շնորհելու հակառակորդները ցույց են անցկացրել նախագահ Իցհակ Հերցոգի՝ Թել Ավիվում գտնվող անձնական նստավայրի առջև։ Ցույցի մասնակիցները վանկարկել են «Ո՛չ Իսրայելը ոչնչացնողին ներում շնորհելուն»։
 Կիրակի օրը, ավել քան վեց տարի շարունակվող դատավարությանը զուգահեռ, Նեթանյահուն պաշտոնապես ներման խնդրանքը ներկայացրել է ռեժիմի ղեկավարին՝ անվտանգության և քաղաքական պատճառներով, սակայն նրա հակառակորդները կոշտ դիրքորոշում են զբաղեցրել նրա դեմ այս հարցում։