Չիկագոյի համալսարանի պրոֆեսոր․ Թրամփը հայտնվել է լարվածության սրման ծուղակում
Չիկագոյի համալսարանի պրոֆեսոր Ռոբերտ Փեյփը հայտարարել է, որ ԱՄՆ-ն Իրանի հետ հակամարտությունում հայտնվել է «պատմության ամենավտանգավոր լարվածության սրման ծուղակում», և ԱՄՆ նախագահ Դոնալդ Թրամփն այժմ կանգնած է բարդ ընտրության առջև։
«Ալ Ջազիրա»-ին տված հարցազրույցում Փեյփը նշել է, որ ԱՄՆ-ի օդային և ծովային հարվածները, թեև տակտիկական մակարդակում որոշակի արդյունքներ են տվել, սակայն չեն կարողացել ապահովել ռազմավարական նպատակների իրականացումը։
Նրա խոսքով՝ Վաշինգտոնը չի հասել իր ռազմավարական նպատակներից որևէ մեկին, մինչդեռ Իրանը պատերազմից հետո հայտնվել է նախկինից ավելի ուժեղ դիրքերում։
Փեյփի գնահատմամբ՝ Թրամփը ներկայումս երկու տարբերակի առջև է՝ կամ ընդունել Իրանի ազդեցության աճը տարածաշրջանում, կամ էլ ավելի սրել հակամարտությունը։
«Երրորդ տարբերակ գոյություն չունի»,- ընդգծել է նա։
Չիկագոյի համալսարանի պրոֆեսորը նաև զգուշացրել է, որ ԱՄՆ նախագահը բախվել է երկրի օդային և ծովային ուժերի հնարավորությունների սահմանափակումներին, ինչի հետևանքով կարող է հակվել ցամաքային գործողությունների տարբերակին։
Միևնույն ժամանակ, ռազմական և քաղաքական մի շարք վերլուծաբաններ նշում են, որ Իրանի դեմ լայնածավալ ցամաքային գործողությունը կպահանջի տասնյակ հազարավոր զինծառայողների ներգրավում և կարող է հանգեցնել ամերիկյան կողմի զգալի կորուստների։
