Ինչպե՞ս է Տաշքենդը աստիճանաբար դառնում «տարածաշրջանային երկաթուղային հանգույցը»
Իրան-ԱՄՆ պատերազմը և որոշ տարանցիկ երթուղիների խափանումը նոր հնարավորություն են ստեղծել Կենտրոնական Ասիայի երկրների, այդ թվում՝ Ուզբեկստանի համար. Տաշքենդը, զարգացնելով երկաթուղային կապերը Չինաստանի, Աֆղանստանի, Պակիստանի, Կովկասի և Թուրքիայի հետ, փորձում է գրավել արևելք-արևմուտք բեռնափոխադրումների հոսքի մի մասը և ամրապնդել իր դիրքերը որպես տարածաշրջանային տարանցիկ հանգույցներից մեկը։
Pars Today-ի տվյալներով՝ չնայած ցամաքով շրջափակված լինելուն, Ուզբեկստանը իր օրակարգում ունի երկաթուղային ենթակառուցվածքների և միջազգային միջանցքների հետ կապի զարգացումը։ Երկրի նախագահի հայտարարության համաձայն՝ 2025 թվականին Ուզբեկստանով անցել է մոտ 15.3 միլիոն տոննա տարանցիկ բեռ, ինչը մոտ 54%-ով ավելի է 2021 թվականի համեմատ։
Միջին միջանցքին մասնակցելուց բացի, Տաշքենդը ձգտում է երկաթուղային կապ ունենալ Աֆղանստանի և այնտեղից՝ Պակիստանի ու այդ երկրի հարավային նավահանգիստների հետ. երթուղի, որի կառուցումը ավարտվելու դեպքում, կարող է ամրապնդել Ուզբեկստանի անուղղակի մուտքը դեպի բաց ջրեր։ Միևնույն ժամանակ, Նախիջևան-Թուրքիա երկաթուղային նախագծին մասնակցության հարցի քննարկումը ցույց է տալիս այդ երկրի ջանքերը՝ դիվերսիֆիկացնելու համաշխարհային շուկաներ մուտքի ուղիները։
Այս տեսանկյունից, տարածաշրջանում տարանցիկ մրցակցությունը այլևս չի սահմանափակվում ավանդական երթուղիներով, և Կենտրոնական Ասիայի ու Կովկասի երկրները և Թուրքիան ձգտում են ավելի մեծ բաժին ունենալ Արևելք-Արևմուտք առևտրում՝ զարգացնելով երկաթուղային ենթակառուցվածքները։ Ընդորում, երկաթուղային նախագծերի ավարտման արագությունը և դրանց միացումը միջազգային ցանցերին որոշիչ դեր կխաղան տարածաշրջանում Կենտրոնական Ասիայի և Կովկասի երկրների ապագա նշանակության մեջ։