Իրանի առաջին մասնակցությունն ԱՊՀ գագաթնաժողովին

Իրանի Իսլամական Հանրապետության նախագահը առաջին անգամ որպես հատուկ հյուր կմասնակցի Անկախ պետությունների համագործակցության (ԱՊՀ) գագաթնաժողովին, որը կանցկացվի Թուրքմենստանի Ավազա շրջանում։

Այս հանդիպումը հնարավորություն է Իրանի և Կենտրոնական Ասիայի, Ռուսաստանի ու Կովկասի երկրների միջև խորհրդակցությունների ընդլայնման համար։

Pars Today-ի հաղորդմամբ՝ Մասուդ Փեզեշքիանը հոկտեմբերի 9-ին կմասնակցի ԱՊՀ գագաթնաժողովին։
Գագաթնաժողովին
կմասնակցեն նաև Ադրբեջանի, Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի ղեկավարները։

Գագաթնաժողովի օրակարգի հիմնական թեմաներն են քաղաքական, տնտեսական և հումանիտար համագործակցությունը, ինչպես նաև կազմակերպության հետագա ծրագրերը։

Փեզեշքիանը Թուրքմենստան կատարած այցի շրջանակում կմասնակցի նաև Կասպից ծովի բնապահպանական գագաթնաժողովին և կհանդիպի ու բանակցություններ կանցկացնի Ռուսաստանի նախագահ Վլադիմիր Պուտինի հետ։ Այս հանդիպումներում Իրանի մասնակցությունը հնարավորություն կտա քննարկելու տարածաշրջանային համագործակցությունն ու երկկողմ հարաբերությունները մասնակից երկրների հետ։