Անկարայի և Վաշինգտոնի հարաբերությունների պահպանությունը կախված է Գյուլենի հանձնումից
Պաշտոնական Անկարան հարցականի տակ է դնում իր և Վաշինգտոնի նախկին հարաբերությունների պահպանությունը՝ կախված ԱՄՆ-ում բնակվող ընդդիմադիր իսլամական քարոզիչ Ֆեթհուլլահ Գյուլենի արտահանձնումից:
Այդ մասին The Guardian թերթին տված հարցազրույցում հայտարարել է Թուրքիայի վարչապետ Բինալի Յըլդըրդըմը:
«Թուրքիան և ԱՄՆ-ն ընկերական, փոխադարձ շահավետ հարաբերություններ են ունեցել, դաշնակիցներ և ստրատեգիական գործընկերներ են եղել շատ երկար ժամանակ, և մենք չենք հավատում, որ այդ հարաբերությունները պետք է դադարեցվեն այդ ահաբեկչական խմբավորման առաջնորդի պատճառով: Իհարկե, քանի դեռ այդ ահաբեկչական խմբավորման առաջնորդը շարունակում է ապրել ԱՄՆ-ում, մարդկանց մտքերում հարց է առաջանում, արդյոք այստեղ չի եղել ԱՄՆ-ի մասնակցությունը կամ աջակցությունը: Այդ պատճառով, ԱՄՆ-ն պետք է իսկապես մտածի, թե ինչպես է համագործակցելու Թուրքիայի հետ, որը նրա համար թե տարածաշրջանում, թե աշխարհում ստրատեգիական դաշնակից է»,- ընդգծել է վարչապետը:
