Գերմանիան կատարեց մեր պահանջը. Չավուշօղլուն՝ գերմանացի պատգամավորներին «Ինջիրլիք» այցելելու թույլտվության մասին
Թուրքական NTV հեռուստաալիքի փոխանցմամբ՝ Թուրքիայի արտգործնախարար Մևլյութ Չավուշօղլուն Սաուդյան Արաբիայի արտգործնախարար Ադել ալ-Ջուբեյրի հետ համատեղ մամուլի ասուլիսի ժամանակ բացատրել է, թե ինչու են Թուրքիայի իշխանությունները թույլ տվել գերմանական պատվիրակության այցը «Ինջիրլիք»:
Չավուշօղլուն հայտարարել է, որ Գերմանիան կատարել է Թուրքիայի պահանջը՝ հայտարարելով, որ Բունդեսթագի կողմից Հայոց ցեղասպանության ճանաչման մասին որոշումը իրավական առումով պարտավորեցնող չէ:
«Մենք պայման ենք ներկայացրել Գերմանիային: Գերմանիան կատարել է այն՝ հայտարարելով, որ այդ որոշումը չունի իրավական որևէ ուժ: Գերմանիան այդ առումով արդարացրել է մեր ակնկալիքները: Նրանք տեսան, որ մենք կարող ենք անել այն, ինչ ցանկանում ենք, և որ Թուրքիայի հետ նրանք (Գերմանիան) չեն կարող վարվել այդպես»,- ասել է Չավուշօղլուն:
Ավելի վաղ Գերմանիայի արտգործնախարար Ֆրանկ Վալտեր Շտայնմայերը հայտարարել էր, որ Թուրքիան թույլ է տվել գերմանացի պատգամավորների այցը «Ինջիրլիքի» բազա:
1in.am
