ԱՄՆ-ի հետ հարաբերություններում «շրջադարձային պահ» է եկել. Չինաստանի նախագահ
Չինաստանի նախագահ Սի Ցզինպինը հայտարարել է, որ ԱՄՆ նախագահական ընտրություններից հետո Պեկինի և Վաշինգտոնի հարաբերությունների համար «շրջադարձային պահ» է եկել: Այս մասին հայտնում է BBC-ն:
Չնշելով ԱՄՆ նորընտիր նախագահ Դոնալդ Թրամփի անունը՝ Չինաստանի նախագահը ԱՄՆ նախագահ Բարաք Օբամայի հետ հանդիպումից առաջ կողմ է արտահայտվել ԱՄՆ նոր վարչակազմի օրոք երկու երկրների հարաբերությունների աստիճանական փոփոխությանը:
«Հուսով եմ՝ երկու կողմերը միասին կաշխատեն՝ կենտրոնանալով համագործակցության վրա, կհաղթահարեն տարաձայնությունները և հարաբերությունների աստիճանական փոփոխություն կապահովեն»,- հայտարարել է Սի Ցզինպինը Պերուում Ասիա-խաղաղօվկիանոսյան տնտեսական համագործակցության գագաթնաժողովում, որի շրջանակներում բանակցել է իր ամերիկացի գործընկերոջ հետ:
Չինաստանի նախագահը նաև Օբամային շնորհակալություն է հայտնել երկու երկրների կապերի ամրապնդման համար:
Շաբաթվա սկզբին Դոնալդ Թրամփը Սի Ցզինպինի հետ հեռախոսազրույցում ասել է, որ հավատում է Պեկինի հետ սերտ համագործակցությանը:
1in.am
