Ճապոնիան կարող է առողջ սննդակարգի մոդել առաջարկել աշխարհին

Ճապոնիան կարող է պարծենալ սննդակարգի ունիկալ մշակույթով, որն ունակ է օրինակ ծառայել աշխարհի համար։

Այս մասին հայտնել է ՄԱԿ-ի Պարենամթերքի ու գյուղատնտեսական կազմակերպության՝ FAO-ի գլխավոր տնօրեն Ժոզե Գրացիանու դա Սիլվան Ճապոնիա կատարած իր այցի ժամանակ։ Ճապոնացիները զարգացած երկրների շրջանում ճարպակալման ամենացածր ցուցանիշն ունեն՝ մեծահասակների ընդամենը չորս տոկոսն է  տառապում հավելյալ քաշից։

FAO-ի ղեկավարը նշել է «Ճապոնիայի առողջ ու եզակի սննդակարգը», որը ավանդաբար ներառում է շատ բանջարեղեն, միրգ ու ծովամթերք։ Նա օրինակ է բերել Վասյոկեն՝ սնունդ պատրաստելու ու գործածելու հետ կապված հմտությունների, գիտելիքների ու ավանդույթների հավաքածու, որը ՅՈՒՆԵՍԿՕ-ի կողմից ճանաչվել է Ոչ նյութական համաշխարհային մշակութային ժառանգություն։ Գրացիանո դա Սիլվայի խոսքով Վասյոկու մշակույթի հիմքում «բնության հանդեպ հարգանքն է։ Այն ենթադրում է ճարպի ցածր պարունակությամբ թարմ սեզոնային մթերքների գործածում։

Ժոզե Գրացիանու դա Սիլվան նաեւ շնորհակալություն է հայտնել Տոկիոյին՝ FAO-ի նախագծերի միջոցով զարգացող երկրներին պարենամթերքի ու սպառման, նաեւ անտառային ու ձկնային տնտեսությունների, կենդանաբուծության, հողային ու ջրային ռեսուրսների ոլորտներում աջակցելու համար։

Ճապոնիան ավելի քան 100 մլն դոլար է հատկացրել Աֆղանստանում FAO-ի գյուղատնտեսական նախագծերին, որոնք մասնավորապես կապակցված են երկրի ոռոգման համակարգի վերակագնման հետ։

Մյանմարում ճապոնական կառավարության միջոցները FAO-ին օգնել են արտակարգ օգնություն տրամադրել գյուղական տնտեսություններին, որոնք տուժել էին ջրհեղեղներից ու հակամարտություններից։ Ճապոնիան բարձրորակ սերմեր ու պարարտանյութեր էր տրամադրել։

News.am